खामगावच्या तहसीलदारांची शरद पवारांना नोटीस! ३१ मे रोजी हजर राहण्याचे निर्देश; वाचा काय आहे प्रकरण..
May 30, 2024, 09:07 IST
खामगाव(भागवत राऊत:बुलडाणा लाइव्ह वृत्तसेवा):खामगावचे तहसीलदार अतुल पाटोळे यांनी शरद पवार यांना नोटीस बजावून ३१ मे रोजी हजर राहण्याचे आदेश दिले आहेत. अवैध गौण खनिज उत्खननाचे हे प्रकरण आहे. एका गटाची गौण खनिज उत्खननाची परवानगी घेऊन दुसऱ्याच गटातील उत्खनन केल्याचे हे प्रकरण आहे.
खामगाव तालुक्यातील टेंभुर्णा येथील गट नंबर (९०) मधील गौण खजिन उत्खननाची परवानगी घेऊन, गट नंबर (९१) मध्ये उत्खनन करण्यात आले आहे. त्यामुळे नियमाचा भंग झाल्याने खामगावचे तहसीलदार अतुल पाटोळे यांनी खदान मालक शरद शोभाराव पवार यांना नोटीस बजावून ३१ मे रोजी समक्ष हजर राहण्याचे आदेश दिले आहेत. गट नंबर (९०) हा शरद पवार (रा. टेंभुर्णा) यांच्या मालकीचा आहे. या गटातील गौण खनिज उत्खननाची परवानगी काढून त्यांनी खाणकाम क्षेत्रात समाविष्ट नसलेल्या लगतच्या गट नंबर (९१) मध्ये मोठ्या प्रमाणात अवैधरीत्या गौण खनिज उत्खनन करून शासनाचे महसुलाचे बुडवून शासनाचे नुकसान केले आहे.
जिल्हा खनिकर्म विभागाकडे तक्रार करण्यात आल्यानंतर चौकशी करून, गौण खनिज उत्खननाचे मोजमाप करून महसूल महसूल करावा असा आदेश दिला आहे. तहसीलदार पाटोळे यांच्या आदेशान्व मंडळ अधिकारी आवार व तलाठी टेंभुर्णा यांनी स्थळ निरीक्षण करून गट क्रमांक (९१) हा खाणकाम क्षेत्रामध्ये समाविष्ट करण्याआधी मोठ्या प्रमाणात उत्खनन झाल्याचा अहवाल सादर केला आहे. तहसीलदार पाटोळे यांनी खदान मालक शरद शोभाराव पवार यांना तशी नोटीस बजावली आहे. त्यामध्ये नमूद केल्यानुसार मोका पाहणी मध्ये गट नंबर (९०) मधील गौण खनिज उत्खननाची परवानगी काढलेली असून उत्खनन मात्र गट नंबर (९१) मध्ये सुरू असल्याचे दिसून येत आहे. अवैधरीत्या उत्खनन व वाहतूक केल्याबाबतच्या रॉयल्टी पावत्या तसे उत्खनना बाबतची संबंधित कागदपत्रे व लेखी खुलासासह ३१ मे रोजी तहसील कार्यालयात उपस्थित राहावे असे नमूद केले आहे. याबाबतचा खुलासा मदतीमध्ये सादर न केल्यास दंडात्मक कारवाई करण्यात येईल. असा इशाराही तहसीलदार यांनी आपल्या नोटीशीमध्ये दिला आहे.