मुख्यमंत्र्यांच्या सभेत शेतकऱ्याचा आक्रोश! म्हणाले, बसून बसून आमचे टोंगळे दुखायले; मुख्यमंत्री आमचं एकतील का? पीक विम्याची रक्कम अजूनही मिळाली नाही; मलगीच्या शेतकऱ्याची व्यथा

बसून बसून आमचे टोंगळे दुखायले, मुख्यमंत्री त्यांचं भाषण सांगणार की आमचं ऐकणार असं म्हणत चिखली तालुक्यातील मलगी येथील शेतकरी संजय किसन सावंत आक्रोश करीत होते. टिव्हीवर आमच्या बातम्या दिसत नाहीत, पत्रकार मुख्यमंत्र्याकडे कॅमेरे लावून आहेत, आमचं मात्र कुणीच ऐकत नाही असं शेतकरी सावंत म्हणत होते.

मुख्यमंत्र्यांना निवेदन देण्यासाठी सकाळी १० वाजेपासून त्यांनी स्टेजजवळ जागा पकडली होती, मुख्यमंत्र्यांच्या वाटेकडे ते डोळे लावून होते. संजय सावंत यांची मलगी शिवारात ३ एकर शेती आहे.  त्यांच्या शेतात त्यांनी सोयाबीन आणि तुरीची पेरणी केली होती. १४५० रुपये त्यांनी पीक विमा भरला होता. अतिवृष्टीने नुकसान झाल्यानंतर त्यांनी विमा कंपनीकडे ऑनलाईन तक्रार केली होती, मात्र पंचनामे होऊनही त्यांना १ रुपया देखील परतावा मिळाला नाही. आपल्याला पीक विमा मिळाला पाहिजे, मुख्यमंत्र्यांनी जरा आमच्याकडे पहावे असेही शेतकरी सावंत म्हणत होते.