कोरोना... शतकांचा खेळ पुन्हा सुरू!; जिल्ह्याचे शतक, बुलडाणा तालुक्याचे अर्धशतक अन्‌ रुग्णसंख्या त्रिशतकापल्याड!! कोरोनाच्या मुसंडीने प्रशासन अलर्ट मोडवर
मागील पाच दिवसांपूर्वी आपल्या आगमनाची वर्दी, नंतर चाहूल देणाऱ्या कोरोना ऊर्फ कोविडकुमारने आज जिल्हा हादरवून सोडला! पुन्हा एकदा संपूर्ण जिल्हा कवेत घेणाऱ्या या संकटाने बुलडाणा तालुक्यात कोरोना भूकंपाची नोंद झाली. जिल्ह्याच्या शतकात (१०५ पॉझिटिव्ह) एकट्या बुलडाणा तालुक्याने ५० रुग्णांसह मोठा वाटा उचलला! यंदाही टॉपर असलेल्या बुलडाणासह नांदुरा १५, शेगाव १२ ,चिखली ८, खामगाव ९ या तालुक्यांवरील भयावह धोक्याची घंटी आजच्या आकडेवारीने वाजवली. देऊळगाव राजा व मोताळ्यात प्रत्येकी ३, मेहकर व लोणारात प्रत्येकी २, सिंदखेड राजात १ अशी अन्य तालुक्याची स्थिती आहे. मलकापूर, संग्रामपूर ,जळगाव हे निरंक असणे हाच आजचा दिलासा आहे.
चाचण्या वाढल्या, रुग्णही वाढले...
दरम्यान, कोरोनाच्या कमबॅकमुळे चाचण्यांची गती व संख्याही वाढली! आजच्या अहवालानुसार १११५ पैकी १०५ जण पॉझिटिव्ह निघाले आहे. यामुळे सध्याच्या कालच्या २३१ कोरोना रुग्णांत मोठी भर पडून ती ३३६ इतकी झाली. ७७१ जणांच्या रॅपिड टेस्ट घेण्यात आल्या.