संतापजनक.! वादळामुळे झोका उडून मृत पावलेल्या सईच्या कुटुंबियांना ४ लाखांचा चेक दिला,पण खात्यात पैसेच नाही?

   चिखली तालुक्यातील देऊळगाव घुबे येथे १२ जून रोजी आलेल्या वादळात छतासह झोका उडून गेल्याने सई भारत साखरे या ६ वर्षीय चिमुकलीचा मृत्यू झाला होता. राज्य शासनाच्या वतीने केंद्रीय मंत्री ना.प्रतापराव जाधव यांच्या हस्ते मृतक सईच्या कुटुंबियांना ४ लाख रुपयांच्या शासकीय मदतीचा धनादेश देण्यात आला होता. मात्र चिखली तहसीलदारांनी सही असलेल्या या चेक च्या बँक खात्यात पैसे नाहीत का? असा धक्कादायक सवाल उपस्थित झाला आहे..

    पूर्वनियोजित सत्काराचे कार्यक्रम बाजूला ठेवून केंद्रीय मंत्री ना. प्रतापराव जाधव यांनी संवेदनशीलता दाखवत १५ जून रोजी देऊळगाव घुबे येथे भेट दिली होती. त्यावेळी चिखली तहसील कार्यालयाच्या अधिकाऱ्यांच्या उपस्थित ना.प्रतापराव जाधव यांच्या हस्ते सईच्या कुटुंबियांना ४ लाखांचा धनादेश देण्यात आला होता. मात्र संबधित खात्यात पैसे नाही का? असा सवाल उपस्थित झाला आहे. कारण सईच्या कुटुंबियांना सध्या चेक लावू नका असे सांगण्यात आल्याचे त्यांनी बुलडाणा लाइव्ह शी बोलतांना सांगितले.

चिखलीचे तहसीलदार म्हणाले...

दरम्यान या संतापजनक आणि चीड आणणाऱ्या प्रकारानंतर बुलडाणा लाइव्ह ने चिखलीचे तहसीलदार संतोष काकडे यांचे म्हणणे जाणून घेतले.यावेळी तहसील काकडे यांचे उत्तर चक्रावून टाकणारे होते. मी दोन तीन दिवसांपासून सुट्टीवर होतो. मला याविषयासंदर्भात काहीही माहिती नाही. मी माहिती घेऊन सांगतो असे ते म्हणाले. यावर बुलडाणा लाइव्हने संबधित खात्यात कधी पैसे पडतील? याची आता माहिती मिळू शकत नाही का असे विचारले असता आताच्च कशी माहिती देऊ..उद्या देतो असे सांगितले.