महाराष्ट्र दिनानिमित्त जिल्ह्याला उद्देशून पालकमंत्र्यांचे भाषण! म्हणाले,जिल्ह्याचा सर्वांगीण विकास करण्यासाठी शासन कटिबद्ध; सरकारच्या योजनांचा वाचला पाढा
सरकारने आता १२ ते १४ वर्षे वयोगटातील मुलांसाठी लसीकरण सुरू केले आहे. आतापर्यंत या वयोगटातील ३३ हजार ७९१ जणांना लसीचा पहिला डोस देण्यात आल्याचे त्यांनी सांगितले. कोरोना काळात ज्या बालकांनी आपले दोन्ही पालक गमावले अशा १५ बालकांना ५ लाख रुपयांचे मुदत ठेव प्रमाणपत्र आणि अनाथ प्रमाणपत्र देण्यात आल्याचेही त्यांनी सांगितले. कोविडमुळे पती गमावलेल्या महिलांसाठी मिशन वात्सल्य योजना सुरू करण्यात आली असून जिल्ह्यातील ३३७ विधवा महिलांना या योजनेचा लाभ देण्यात आल्याचेही त्यांनी सांगितले.
शिवभोजन थाळी केंद्रातून गेल्या वर्षभरात ९ लाख ३६ हजार थाळ्या वितरित करण्यात आल्या आहेत. जिल्ह्यात वर्षभरात ३४० पाणंद रस्ते तयार करण्यात आले आहेत. १ लाख ७४ हजार ७२८ शेतकऱ्यांचे ११५३ कोटी रुपयांचे कर्ज माफ करण्यात आल्याचेही त्यांनी सांगितले. पंतप्रधान आवास योजनेच्या माध्यमातून आतापर्यंत १८ हजार ९७९ घरकुल पूर्ण करण्यात आले आहेत.
याशिवाय रमाई आवास योजनेतून २०२१ - २०२२ मध्ये ८ हजार ४६२ घरकुलांना मंजुरी देण्यात आल्याचेही पालकमंत्री डॉ. शिंगणे यांनी सांगितले. भाषणानंतर पालकमंत्र्यांनी उपस्थित असलेल्या स्वातंत्र्य सैनिकांची, विविध पदाधिकाऱ्यांची भेट घेतली. जिल्हा नियोजन समितीच्या निधीतून पोलीस विभागासाठी देण्यात आलेल्या वाहनांना त्यांनी हिरवी झेंडी दाखवली. यावेळी जिल्हाधिकारी एस रामामुर्ती, जिल्हा परिषदेच्या मुख्य कार्यकारी अधिकारी भाग्यश्री विसपुते, जिल्हा पोलीस अधीक्षक अरविंद चावरीया यांची उपस्थिती होती.