बोगस डॉक्टरांवर १५ दिवसांत कारवाई करणार! तालुका वैद्यकीय अधिकाऱ्यांचे लेखी आश्वासन

गेल्या आठवड्यात केंद्रीय आरोग्य राज्यमंत्री डॉ. भारतीताई पवार जिल्हा दौऱ्यावर आल्या असता बोगस डॉक्टरांचा मुद्दा चर्चेला आला होता. मंत्र्यांनी घेतलेल्या आढावा बैठकीत अधिकाऱ्यांना याबद्दल जाब विचारला होता. जिल्हाधिकाऱ्यांच्या नेतृत्वात स्वतंत्र चौकशी नेमण्याचे निर्देश मंत्र्यांनी दिले होते. त्यानंतर दोन दिवसांपूर्वी बुलडाणा शहरातील एका बोगस डॉक्टर दाम्पत्याविरुद्ध गुन्हा दाखल करण्यात आला होता. मात्र चिखली आयुष मेडिकल असोसिएशनने तालुका वैद्यकीय अधिकाऱ्यांना ६० बोगस डॉक्टरांची यादी देऊनही त्यांच्याविरुद्ध कोणतीच कारवाई करण्यात आली नव्हती.

त्यामुळे संतापलेल्या खऱ्या डॉक्टरांनी तालुका वैद्यकीय अधिकाऱ्यांच्या कार्यालयात ठिय्या मांडला. अखेर रात्री तालुका वैद्यकीय अधिकाऱ्यांनी लेखी आश्वासन डॉक्टरांना दिले. तालुक्यातील बोगस डॉक्टरांची  माहिती प्राथमिक आरोग्य केंद्र स्तरावरून घेऊन ही माहिती तालुका बोगस डॉक्टर शोध समितीसमोर ठेवण्यात येईल. त्यानंतर १५ दिवसांत धाडसत्र राबवून व पंचनामा करून बोगस डॉक्टरांविरुद्ध फौजदारी कारवाई करण्यात येईल, असे लेखी आश्वासन तालुका वैद्यकीय अधिकाऱ्यांनी दिले आहे. त्यामुळे चिखली तालुक्यातील बोगस डॉक्टरांचे धाबे दणाणले अाहेत.