वाहनधारकांनो, बातमी कामाची! वाहनांना हाय सेक्युरिटी रजिस्ट्रेशन प्लेट बसवली का? आता वाहनधारकांना अल्टीमेटम ; अन्यथा ३० जूननंतर होणार दंडात्मक कारवाई! काय आहे प्रोसेस? जाणून घ्या...
May 8, 2025, 18:37 IST
बुलढाणा (जिमाका : बुलडाणा लाइव्ह वृत्तसेवा) : जिल्ह्यातील वाहनधारकांसाठी महत्त्वाची बातमी आहे. १ एप्रिल २०१९ पूर्वी नोंदणी झालेल्या सर्व प्रकारच्या जुन्या वाहनांना हाय सेक्युरिटी रजिस्ट्रेशन प्लेट (एचएसआरपी) बसवणे अनिवार्य करण्यात आले आहे. यासाठी शासनाने ३० जून २०२५ पर्यंतची अंतिम मुदत निश्चित केली आहे. या मुदतीत हाय सेक्युरिटी रजिस्ट्रेशन प्लेट न बसवल्यास वाहनधारकांना दंडात्मक कारवाईला सामोरे जावे लागणार आहे.
उप-प्रादेशिक परिवहन अधिकारी, बुलढाणा यांनी दिलेल्या माहितीनुसार, जिल्ह्यात हाय सेक्युरिटी रजिस्ट्रेशन प्लेट बसवण्यासाठी एकूण २० फिटमेंट सेंटर सुरू करण्यात आले आहेत. अर्जदारांना यासाठी ऑनलाईन पद्धतीने अर्ज करणे आवश्यक आहे. अर्जात आपल्या जवळपासचे फिटमेंट सेंटर निवडण्याचा पर्याय उपलब्ध आहे. तसेच, जर वाहनधारकांना पुरवठादाराकडून घरी एचएसआरपी बसवून घ्यायची असेल, तर त्यासाठी देखील अर्ज करताना पर्याय निवडता येतो.
जिल्ह्यात अंदाजे २ लाख ९० हजार जुनी वाहने आहेत, ज्यांना हाय सेक्युरिटी रजिस्ट्रेशन प्लेट बसवणे आवश्यक आहे. मात्र, आत्तापर्यंत केवळ १२ हजार वाहनचालकांनीच यासाठी ऑनलाईन अर्ज दाखल केले आहेत. वाहनधारकांना अंतिम मुदतीत तातडीने अर्ज करण्याचे आवाहन परिवहन विभागाने केले आहे.
हाय सेक्युरिटी रजिस्ट्रेशन प्लेट बसवण्यासाठी वाहनधारकांना महाराष्ट्र शासनाच्या परिवहन विभागाच्या https://transport.maharashtra.gov.in या अधिकृत संकेतस्थळावर जाऊन ऑनलाईन अर्ज करायचा आहे. अर्जात आवश्यक माहिती भरल्यानंतर, त्यांना आपल्या सोयीनुसार फिटमेंट सेंटर आणि वेळ निवडण्याचा पर्याय मिळतो. ऑनलाइन पेमेंटची सुविधा देखील उपलब्ध आहे.
अनेक वाहनधारकांनी अद्याप हाय सेक्युरिटी रजिस्ट्रेशन प्लेट बसवण्याकडे दुर्लक्ष केले आहे. मात्र, ३० जून २०२५ नंतर परिवहन विभाग एचएसआरपी नसलेल्या वाहनांवर दंडात्मक कारवाई करणार आहे. नियमांनुसार, दंडाची रक्कम मोठी असू शकते आणि वारंवार नियम मोडल्यास वाहनाचे रजिस्ट्रेशन देखील रद्द केले जाऊ शकते. त्यामुळे, वाहन मालकांनी या अंतिम मुदतीची गांभीर्याने दखल घेणे आवश्यक आहे.
जिल्ह्यातील सर्व वाहन मालकांनी कोणताही विलंब न करता त्वरित ऑनलाईन अर्ज सादर करावा आणि ३० जून २०२५ पूर्वी आपल्या वाहनांना हाय सेक्युरिटी रजिस्ट्रेशन प्लेट बसवून घ्यावि. तसेच भविष्यात होणारी दंडात्मक कारवाई टाळावी, असे आवाहन देखील उप-प्रादेशिक परिवहन अधिकारी, बुलढाणा यांनी केले आहे.
परिवहन विभागाने हाय सेक्युरिटी रजिस्ट्रेशन प्लेट बसवण्याची प्रक्रिया सुलभ आणि जलद करण्यासाठी व्यवस्था केली आहे. जिल्ह्यातील विविध ठिकाणी फिटमेंट सेंटर्स कार्यरत आहेत, जेणेकरून वाहनधारकांना गैरसोय होणार नाही. तरीही, जर कोणाला अर्ज भरण्यात किंवा इतर कोणत्याही अडचणी येत असतील, तर ते संबंधित फिटमेंट सेंटर किंवा परिवहन कार्यालयाशी संपर्क साधू शकतात.
शेवटी, बुलढाणा जिल्ह्यातील सर्व वाहनधारकांनी या संधीचा लाभ घ्यावा आणि अंतिम मुदत संपण्यापूर्वी आपल्या वाहनांना हाय सेक्युरिटी रजिस्ट्रेशन प्लेट बसवून शासनाच्या नियमांचे पालन करावे, असे आवाहन परिवहन कार्यालयाकडून करण्यात आले आहे.