शेतकऱ्यांसाठी परदेश अभ्यास दौऱ्याची सुवर्णसंधी! कृषी विभागाचा नाविन्यपूर्ण उपक्रम; अर्ज सादर करण्याची अंतिम तारीख २४ जुलै!

कोणत्या देशात काय शिकायला मिळेल?
युरोप (नेदरलँड्स, जर्मनी, स्वित्झर्लंड, फ्रान्स) – फलोत्पादन, सेंद्रिय शेती, दुग्धोत्पादनातील आधुनिक पद्धती
इस्राईल – पाणी व्यवस्थापन आणि कृषी यांत्रिकीकरण
जपान – सेंद्रिय शेती व अत्याधुनिक कृषी प्रयोगशाळा तंत्रज्ञान
मलेशिया, व्हिएतनाम, फिलीपाइन्स – काढणीपश्चात व्यवस्थापन प्रणाली
चीन – कृषी EXPO आणि पीक उत्पादनवाढ तंत्र
द. कोरिया – अन्न प्रक्रिया तंत्रज्ञान व कृषी उत्पादनांची गुणवत्ता वाढवणारे उपाय

पात्रतेचे महत्त्वाचे निकष:
अर्जदार स्वतः शेतकरी असावा आणि शेती हेच मुख्य उत्पन्नाचे साधन असावे.त्याच्या नावावर ७/१२ व ८-अ उतारे (मागील ६ महिन्याचे) असावेत.अॅग्रीस्टॅक अंतर्गत 'Farmer ID' अनिवार्य. वैध पासपोर्ट असणे आवश्यक, ज्याची मुदत किमान ३ महिने शिल्लक असावी. वय किमान २५ वर्षे; शारीरिक तंदुरुस्तीचे प्रमाणपत्र बंधनकारक.अर्जदार शासकीय/खाजगी नोकरीत नसावा व वैद्यकीय/व्यावसायिक व्यावसायिक नसावा.यापूर्वी शासनाच्या खर्चाने परदेश दौरा केलेला नसावा.

आर्थिक सहाय्य:
राज्य शासनाकडून दौऱ्याच्या एकूण खर्चाच्या ५० टक्के किंवा ₹१ लाख (जे कमी असेल ते) इतके अनुदान दिले जाईल. उर्वरित रक्कम शेतकऱ्यांनी स्वतः भरायची आहे.

अर्ज प्रक्रिया:
इच्छुक शेतकऱ्यांनी प्रपत्र-१ नमुन्यातील पूर्ण माहिती असलेला अर्ज २४ जुलै २०२५ पर्यंत तालुका कृषी अधिकारी कार्यालयात सादर करावा. पात्र अर्जदारांची निवड जिल्हास्तरीय समितीमार्फत सोडत पद्धतीने केली जाणार आहे. निवड झालेल्या शेतकऱ्यांना वैद्यकीय प्रमाणपत्र व कोविड चाचणी अहवाल सादर करणे आवश्यक आहे.अधिक माहितीसाठी संबंधित तालुका कृषी अधिकारी कार्यालयाशी तात्काळ संपर्क साधावा, असे आवाहन जिल्हा अधीक्षक कृषी अधिकारी यांनी केले आहे.