मलकापूर रेल्वे स्थानकावर प्रवाशांचा उद्रेक – आर.सी.सी. भिंतीमुळे नागरिक त्रस्त; तातडीने गेट व बुकिंग विंडोची मागणी; अन्यथा रेल रोकोचा इशारा!
Aug 29, 2025, 11:25 IST
मलकापूर (बुलडाणा लाइव्ह वृत्तसेवा) :मलकापूर रेल्वे स्थानकावरील प्लॅटफॉर्म क्र. २ च्या बाजूला बांधण्यात आलेल्या मोठ्या आर.सी.सी. भिंतीमुळे शेकडो प्रवाशांना प्रचंड गैरसोयीचा सामना करावा लागत आहे. पंतनगर, एकतानगर, हाश्मी नगर, कुंड खुर्द, भालेगाव, देवधाबा, धरणगाव, नरवेल, म्हैसवाडी, अनुरावाद, झोडगा, धुपेश्वर, दसरखेड, तालसवाडा, रुईखेड, तिघरा, शिवनी, रणगाव आदी गावांतील नागरिकांना स्थानकात प्रवेश मिळविण्यासाठी तब्बल दोन किलोमीटरचा फेरा मारावा लागत असल्याने प्रवाशांमध्ये तीव्र संताप आहे.
या पार्श्वभूमीवर समतेचे निळे वादळ संस्थापक अध्यक्ष भाई अशांत वानखेडे यांच्या नेतृत्वात प्रवाशांच्या वतीने निवेदन देण्यात आले. निवेदनात दोन प्रमुख मागण्या करण्यात आल्या आहे.यामध्ये प्लॅटफॉर्म क्र. २ वरील भिंतीत प्रवाशांच्या सोयीसाठी मोठे गेट तयार करणे आणि प्लॅटफॉर्म क्र. २ वर स्वतंत्र बुकिंग विंडो उपलब्ध करून देणे यांचा समावेश आहे.
या मागण्या तातडीने पूर्ण न झाल्यास प्रवाशांना लोकशाही मार्गाने मोठे आंदोलन उभारावे लागेल, असा इशारा निवेदनातून देण्यात आला आहे.
सदर निवेदन मलकापूर विधानसभा मतदारसंघाचे आमदार चैनसुख संचेती यांच्यामार्फत केंद्रीय रेल्वे मंत्री अश्विनी वैष्णव यांना देण्यात आले असून, त्याची प्रत केंद्रीय राज्यमंत्री रक्षाताई खडसे तसेच भुसावळ विभागीय रेल्वे व्यवस्थापक यांनाही पाठविण्यात आली आहे.
निवेदन देताना
एन. के. हिवराळे, सतीश नाईक, किशोर रोडे, निखिल चीम, संजय रोडे, दीपक मेश्राम, समाधान सुरवाडे, शिवाजीराव भोसले, रोहित माहूरे, पंकज पालवे, दीपक मोरे, मिलिंद हिवराडे, सिद्धार्थ भालशंकर, रोहन भालशंकर, सचिन तायडे, प्रवीण नाईक यांच्यासह महिला व पुरुष प्रवासी मोठ्या संख्येने उपस्थित होते.
संचेती यांचे समस्या सोडण्याचे आश्वासन
आमदार चैनसुख संचेती यांनी निवेदन स्वीकारत समस्या सोडविण्यासाठी योग्य मार्ग काढण्याचे आश्वासन दिले, मात्र तातडीने तोडगा न निघाल्यास प्रवाशांनी गंभीर आंदोलन आणि थेट रेल रोको करण्याचा इशारा दिला आहे.