बुलडाणा(बुलडाणा लाइव्ह वृत्तसेवा): शिवसेना जिल्हाप्रमुख जालिंधर बुधवंत यांच्या पुढाकारातून आणि खा.अरविंद सावंत आणि विधान परिषदेचे विरोधी पक्ष नेते अंबादास दानवे यांच्या प्रमुख उपस्थितीत आज, बुलडाण्यात निघालेला आक्रोश मोर्चा अतिविराट, अतिविशाल आणि अभूतपूर्व असा ठरला. जिजामाता प्रेक्षागर मैदानाजवळून सुरू झालेला हा मोर्चा संगम चौक, जयस्तंभ चौक, बाजार गल्ली, कारंजा चौक मार्गे बुलडाणा जिल्हाधिकारी कार्यालयावर धडकला. त्यानंतर खा.अरविंद सावंत, अंबादास दानवे, नरेंद्र खेडेकर यांची वादळी भाषणे झाली. त्याआधी जिल्हाप्रमुख जालिंधर बुधवंत यांनी मशाल यात्रा आणि आक्रोश मोर्चा मागची भूमिका विषद केली. खा.अरविंद सावंत यांनी राज्य आणि केंद्र सरकारच्या धोरणांचा खरपूस समाचार घेतला. आ.संजय गायकवाड यांच्यावरही त्यांनी नाव न घेता प्रखर टीका केली. "हा कसला धर्मवीर हा तर कर्मदरिद्री, तुमचा आमदार विकला गेलेला आहे, गद्दार आहे असा प्रहार सावंत यांनी केला.