देऊळगाव राजा पालिकेत आमदार मनोज कायंदे गटाचा दबदबा! ठाकरे सेनेला सोबत घेऊन विरोधकांना जोरदार धक्का; सर्व समित्यांवर वर्चस्व...
Jan 21, 2026, 11:08 IST
देऊळगाव राजा (बुलडाणा लाइव्ह वृत्तसेवा) : नगरपालिकेच्या विविध विषय समित्यांच्या निवडणुकीत आमदार मनोज कायंदे समर्थित गटाने निर्विवाद वर्चस्व प्रस्थापित करत विरोधकांना जबर धक्का दिला आहे. ठाकरे शिवसेनेला सोबत घेऊन रचलेल्या रणनीतीमुळे सर्वच महत्त्वाच्या समित्यांवर कायंदे गटाने आपली पकड मजबूत केली असून, पालिकेतील सत्तासंतुलन पूर्णतः त्यांच्या बाजूने झुकले आहे.
स्थायी समितीच्या अध्यक्षपदी माधुरी तुषार शिपणे यांची निवड करण्यात आली असून, त्या पदसिद्ध सभापती म्हणून कार्यभार सांभाळणार आहेत. पाणीपुरवठा व जलनिस्सारण समितीच्या उपाध्यक्षपदी वनिता भुतडा, तर बांधकाम समितीच्या सभापतीपदी विष्णू झोरे यांची निवड झाली आहे.
स्वच्छता व आरोग्य समितीच्या सभापतीपदी संदीप शिंदे, महिला व बालकल्याण समितीच्या सभापतीपदी शेख नमिराबी अतिक, तर शिक्षण समितीच्या सभापतीपदी राजेंद्र खांडेभराड यांची बिनविरोध निवड करण्यात आली. तसेच वैशाली कासारे या पदसिद्ध सदस्य म्हणून समितीत सहभागी आहेत.
या निवड प्रक्रियेचे प्रशासकीय कामकाज मुख्याधिकारी अरुण मोकळ यांनी पार पाडले. उपविभागीय अधिकारी प्रा. संजय खडसे यांनी पीठासीन अधिकारी म्हणून जबाबदारी सांभाळली. निवडणूक प्रक्रिया शांततेत पार पडल्याबद्दल उपस्थितांचे आभार मानून सभा समाप्त झाल्याचे जाहीर करण्यात आले.
या निवडींमुळे देऊळगाव राजा नगरपालिकेतील राजकारणात आमदार मनोज कायंदे गटाची पकड अधिक भक्कम झाल्याचे चित्र स्पष्ट झाले असून, आगामी काळात पालिकेच्या निर्णय प्रक्रियेवर याच गटाचे वर्चस्व राहणार, हे जवळपास निश्चित मानले जात आहे.