आयाबहिणींची अब्रू सांभाळता येत नसेल तर खुर्च्या खाली करा! माजी जि.प सदस्य दिलीप वाघ यांची घणाघाती टिका; म्हणाले, ३० वर्षात सिंदखेडराजा विधानसभा मतदारसंघाची वाट लागली;
सिंदखेडराजा विधानसभा मतदारसंघात निघाली मशाल यात्रा....
सिंदखेडराजा (बुलडाणा लाइव्ह वृत्तसेवा): राज्यात घोटाळेबाजांचे, खोकेबाजांचे सरकार आहे आया बहिणींची अब्रू राज्यात सुरक्षित नाही. दिवसाला बलात्काराच्या बातम्या येत आहेत. नाव शिवरायांचे घेता मग सरकारही छत्रपती शिवाजी महाराजांच्या नीती प्रमाणे सरकार चालवायला पाहिजे, तुम्हाला आया बहिणींची अब्रू वाचवता येत नसेल तर खुर्च्या खाली करा असा घणाघात शिवसेना ( उबाठा) चे माजी जिल्हा परिषद सदस्य दिलीप वाघ यांनी केला. दिलीप वाघ यांच्या नेतृत्वात सिंदखेडराजा विधानसभा मतदारसंघात शिवसेनेची मशाल यात्रा निघाली आहे. मतदार संघातील गावागावात ही यात्रा जात आहे. दिनांक १५ सप्टेंबर रोजी तेजस्वी महाराज संस्थान वरुडी येथून या यात्रेला प्रारंभ झाला. जिल्हा सह संपर्कप्रमुख छगन मेहत्रे यांनी या मशाल यात्रेचे उद्घाटन केले.यावेळी आशिष रहाटे, किशोर गारोळे यांचीदेखील उपस्थिती होती.