निवडणूक इच्छुकांच्या नजरा आता नोटिफिकेशनकडे! लोणार मध्ये राजकीय घडामोडींना वेग, नेते लागले कामाला....
Updated: May 10, 2025, 11:23 IST
लोणार (प्रेम सिंगी: बुलडाणा लाइव्ह वृत्तसेवा):स्थानिक स्वराज्य संस्थेच्या निवडणुकीसंदर्भात सर्वोच्च न्यायालयाने निर्देश देताच लोणार तालुक्यातील जिल्हा परिषद, पंचायत समिती आणि नगर परिषदेच्या रिंगणात येण्याकरिता प्रतीक्षेत असलेल्यांच्या आशा पल्लवित झाल्या आहेत.
निवडणूक लढण्याकरिता इच्छुक असलेल्यांच्या नजरा आता निघणाऱ्या नोटीफिकेशनकडे लागल्या आहेत. निर्देशाप्रमाणे नोटीफिकेशन निघणार की यात पुन्हा अडथळा येणार, अशी पुसट शंकाही त्यांच्या मनात आहे.
हेही वाचा...
तालुक्यात गेल्या दोन ते तीन वर्षांपासून प्रशासकराज असल्याने त्याचा त्रास लोकप्रतिनिधींसह सर्वसामान्यांना झाल्याचे अनेकवार पुढे आल्याच्या तक्रारी आहेत. निवडणूक लढण्याच्या तयारीत असलेल्यांकडून शासनाच्या आदेशाची प्रतीक्षा होती. अशात न्यायालयाचे निर्देश मिळताच अनेकांना दिलासा मिळाला. नगरपालिकेवर ताबा मिळविण्याकरिता राजकीय पक्षांनी कंबर कसणे सुरू केले आहे. यात सत्ता असलेल्यांकडून पालिकेवर आपला ताबा कायम असावा याकरिता हालचाली करणे सुरू केल्याचे काहींकडून सांगण्यात येत आहे. केवळ नगरपालिकाच नाही तर जिल्हा परिषद आणि पंचायत समितीच्या रिंगणात असलेल्यांकडूनही चर्चा करणे सुरू झाले आहे. इच्छा असलेल्यांच्या नजरा आता चार आठवड्यानंतर निघणाऱ्या नोटीफिकेशनवर आहेत न्यायालयाच्या निर्णयामुळे
निवडणुकीचा बिगुल वाजणार असल्याचे कानी येताच इच्छुकांकडून चर्चा करणे सुरू झाले आहे. त्यांनी न्यायालयाच्या आदेशानुसार तात्काळ कारवाई व्हावी याकरिता साकडे घालणे सुरू केले आहे. न्यायालयाने दिलेल्या निर्देशानुसार कारवाई झाल्यास दिवाळीपूर्वी सर्वच स्थानिक स्वराज्य संस्थेत लोकप्रतिनिधी असतील. सध्या असलेल्या प्रशासक राजमुळे सर्वसामान्यांच्या कामांचा मोठ्या प्रमाणात खोळंबा होत आहे. त्यांना कोणी वाली नसल्याने अडचणी वाढत आहेत. निवडणूक झाल्यास सर्वसामान्यांना त्यांच्या अडचणी सोडविण्याकरिता हक्काचा लोकप्रतिनिधी मिळणार असल्याने जनताही या निवडणुकीकरिता तयार आहे.
पक्ष विभाजनामुळे इच्छुकांना पर्याय...
राजकीय उलथापालथीमध्ये काहींनी जागेवरच थांबून वेट अन्ड वॉचची भूमिका घेतली. तर अनेकांनी सत्तेचा लाभ मिळविण्यासाठी पक्षांतर केले. कायद्याच्या दृष्टीने मूळ पक्ष आमचाच, असा दावा केला जात असला तरी जनतेच्या मनात मूळ पक्षाची संकल्पना निश्चित झाली आहे. सत्तेत असल्यास निधी मिळतो व अन्य कामे होतात. त्यामुळे अनेकांना सत्तेने खुणावले व प्रवेशकर्ते झाले.