रात्रीच्या अंधारात मलकापुरात कोण घालत होतं धुमाकूळ? अखेर पोलिसांनी उघड केला 'त्या' टोळीचा काळाकुट्ट कारनामा...

By Buldana Live Updated: Jun 30, 2026, 14:37 IST

बुलडाणा लाइव्ह ग्रुप चे सदस्य होण्यासाठी येथे क्लिक करा.

मलकापूर (बुलडाणा लाइव्ह वृत्तसेवा) : मलकापूर शहरात रात्रीच्या वेळी सातत्याने घडणाऱ्या चोरीच्या घटनांनी नागरिकांमध्ये भीतीचे वातावरण निर्माण झाले होते. मात्र, या घटनांमागे नेमके कोण आहे, याचा शोध घेत असलेल्या मलकापूर शहर पोलिसांना अखेर मोठे यश मिळाले आहे. पोलिसांनी चोरी करणाऱ्या तिघा आरोपींना अटक करत त्यांच्याकडून तब्बल ३ लाख ९० हजार रुपयांचा मुद्देमाल जप्त केला आहे.मलकापूर शहर पोलीस ठाण्यात २७ जून २०२६ रोजी भारतीय न्याय संहिता (बीएनएस)-२०२३ च्या कलम ३०३(२) अन्वये चोरीचा गुन्हा दाखल करण्यात आला होता. या प्रकरणाचा तपास सुरू करताना पोलिसांनी परिसरातील सीसीटीव्ही फुटेजची बारकाईने तपासणी केली. तसेच गुप्त माहितीच्या आधारे संशयितांचा शोध घेत अखेर तिघांना ताब्यात घेण्यात आले.

अटक करण्यात आलेल्या आरोपींमध्ये शेख साबीर शेख अहेमद (वय ३२), जावेद खान मुसा खान (वय ३८, दोघे रा. सायकलपुरा) तसेच मो. सोहेल मो. रफीक (वय २९, रा. पंतनगर, मलकापूर) यांचा समावेश आहे. पोलिसांनी केलेल्या चौकशीत आरोपींनी शहरातील विविध भागांत चोरी केल्याची कबुली दिली. त्यांच्या ताब्यातून १ लाख रुपयांचे हाऊस वायर, ५० हजार रुपयांचे कृषी साहित्य, ६० हजार रुपयांचे प्लंबिंग साहित्य, ६० हजार रुपयांचे महावितरण कंपनीचे केबल, तसेच चार मोटारसायकली असा एकूण ३ लाख ९० हजार रुपयांचा मुद्देमाल जप्त करण्यात आला आहे.

ही धडक कारवाई पोलीस अधीक्षक निलेश तांबे, अपर पोलीस अधीक्षक पियुष जगताप आणि उपविभागीय पोलीस अधिकारी सोहन माछरे यांच्या मार्गदर्शनाखाली मलकापूर शहर पोलीस ठाण्याचे पोलीस निरीक्षक गणेश गिरी यांच्या नेतृत्वात करण्यात आली.कारवाईत डीबी पथकातील पोलीस उपनिरीक्षक शुभम बरदाडे तसेच पोलीस कर्मचारी आसिफ शेख, संतोष कुमावत, प्रवीण गवई, योगेश तायडे, गणेश बरडे, दिपक सोनोने, नवल राठोड आणि मिनल शिंदे यांनी महत्त्वाची भूमिका बजावली.