पोलीस सांगून आले अन् सव्वातीन लाखांनी लुटले! चिखलीत भर दिवसा थरार...
Jan 13, 2025, 09:05 IST
चिखली(बुलडाणा लाइव्ह वृत्तसेवा): चिखलीत पोलीस सांगून दुचाकीस्वाराला सव्वातीन लाखांनी लुटल्याचा धक्कादायक प्रकार समोर आला आहे..चिखली ते मेहकर फाट्यादरम्यान असलेल्या रामा फोर्स जवळ भर दुपारी हा थरार घडला...
प्राप्त माहितीनुसार कोनड बु येथील सुरेश रामराव परिहार (६०) हे दुचाकीने चिखलीवरून कोनड गावाकडे निघाले होते. त्यावेळी राम फोर्स च्या जवळ पाठीमागून एका दुचाकीवर दोघे जण त्यांच्याजवळ आले. त्यांना गाडी थांबवायला सांगितली..मागच्या चौकात पोलिसांनी शिट्टी वाजवली तुम्ही गाडी का थांबवली नाही अशी विचारणा दुचाकीवरील दोघांनी केली. त्यावेळी मला शिट्टीचा आवाज आला नाही असे सुरेश परिहार यांनी सांगितले.त्याचवेळी तुम्ही हातात अंगठ्या घालून कुठे जात आहात, अंगठ्या काढून घ्या असे दुचाकी वरील दोघांनी सुरेश परिहार यांना सांगितले. सुरेश परिहार अंगठ्या काढून घेत असतानाच दुचाकी वरील एकाने रामपुरी चाकू सुरेश परिहार यांच्या गळ्याला लावला व काही कळण्याच्या आतच गळ्यातील सोन्याचा गोफ व हातातील दोन अंगठ्या असा जवळपास सव्वातीन लाखांचा ऐवज लुटून दुचाकीस्वार विना नंबर प्लेटच्या दुचाकीने फरार झाले... या प्रकारानंतर सुरेश परिहार यांनी घडलेली हकीकत चिखली पोलीस ठाण्यात जाऊन कथन केली.. पोलिसांनी अनोळखी चोरट्याविरुद्ध गुन्हा दाखल केला आहे..