अवैध रेती उपसा करणाऱ्यांचे कंबरडे पुन्हा मोडले; इसरूळ येथे चार बोटी नष्ट...
Updated: Mar 25, 2025, 20:10 IST
बुलडाणा(बुलडाणा लाइव्ह वृत्तसेवा): अवैध रेती उपसा करणाऱ्या बोटींचा शोध घेण्यासाठी जिल्ह्यामध्ये विशेष मोहीम राबविण्यात येत आहे. त्याअनुषंगाने बुलढाणा उपविभागीय कार्यालय व आपत्ती व्यवस्थापन पथकाव्दारे खडकपूर्णा धरणातील अवैध उपसा करणाऱ्या इसरूळ येथे आज दि २५ मार्च रोजी मोठी कारवाई करण्यात आली. महसूल प्रशासनाने चार बोटी नष्ट केल्या, अशी माहिती उपविभागीय अधिकारी शरद पाटील यांनी दिली.
ही कारवाई जिल्हधिकारी डॉ. किरण पाटील व उपविभागीय अधिकारी शरद पाटील यांच्या मार्गदर्शनाखाली राबविण्यात आली. यावेळी तहसिलदार संतोष काकडे, संभाजी पवार, श्रीकृष्ण जाधव, मंडळ अधिकारी भगवानराव पवार, ग्राम महसूल अधिकारी योगेश भुसारी, ना.पो.का विलास पवार, सुनील डव्हळे, अनिल बोंद्रे, विनोद गिरी, नितीन काळे, महसूल सेवक प्रभाकर इंगळे, वाहन चालक संतोष भोपळे, तसेच पोलीस विभागाचे प्रतिनिधी, मंडळ अधिकारी, तलाठी उपस्थित होते. तसेच ब्लास्टिंगसाठी सिंदखेड राजाचे उपविभागीय अधिकारी संजय खडसे, तहसीलदार देऊळगाव राजाचे वैशाली डोंगरजाळ यांचे सहकार्य लाभले.
खरंच रेती उपसा बंद होईल?
महसूल प्रशासनाच्या वतीने यादी देखील खडकपूर्णा धरणात बोटी उध्वस्त करण्यात आल्या होत्या. त्यानंतर जवळपास आठवडाभर रेती उपसा बंद होता. मात्र त्यानंतर पुन्हा माफीयांनी नव्या बोटी आणल्या आणि रेती उपसा आणि वाहतूक सुरू झाली. हे चक्र दोन वर्षांपासून सुरू आहे. मात्र रेतीवाहतूक आणि उपसा काही बंद होत नाही..आता किती दिवस रेती उपसा बंद राहतो हे कळेलच...