अपघाताचा बनाव फसला; पतीनेच एक लाखाची सुपारी देऊन पत्नीचा केला घात; शिक्षिकेच्या अपघात प्रकरणाला वेगळी कलाटणी; पतीसह दोघांना पोलिसांनी ठोकल्या बेड्या...
या प्रकरणी पोलिसांनी मृतक शिक्षिकेचे पती प्रकाश अनंता गावंडे (रा. पातुर्डा) तसेच धडक देणाऱ्या टाटा छोटा हत्ती मालवाहू वाहनाचा चालक मनीष नारायण सिंग सूर्यवंशी यांना अटक केली आहे. सुपारी देण्यामध्ये मध्यस्थी करणारा आरोपी मंगेश चौहूलकर (रा. पातुर्डा) याचा शोध सुरू आहे. अटक आरोपींना ७ मार्च रोजी न्यायालयात हजर केले असता न्यायालयाने त्यांना ९ मार्चपर्यंत पोलीस कोठडी सुनावली.
पोलिसांनी दिलेल्या माहितीनुसार, वृषाली गावंडे या पिंपळगाव काळे येथील जिल्हा परिषद शाळेत शिक्षिका म्हणून कार्यरत होत्या. त्यांचे पती प्रकाश गावंडे यांच्याशी वारंवार वाद होत असल्याने त्यांनी संग्रामपूर पोलीस ठाण्यात कौटुंबिक छळाची तक्रारदेखील दिली होती.
दरम्यान ३ मार्च रोजी कवठळ परिसरात त्यांच्या स्कूटरला मालवाहू वाहनाने मागून जोरदार धडक दिल्याने त्या ठार झाल्याची माहिती समोर आली होती. सुरुवातीला हा अपघात असल्याचे भासवण्यात आले.मात्र मृतक शिक्षिकेचा भाऊ सुमित डोसे यांनी हा प्रकार संशयास्पद असल्याचे पोलिसांना सांगत घातपाताचा संशय व्यक्त केला. त्यानंतर जळगाव जामोद पोलिसांनी तपासाची चक्रे वेगाने फिरवत संपूर्ण कटाचा पर्दाफाश केला.
तपासात उघड झाले की, पती प्रकाश गावंडे व त्याचा मित्र मंगेश चौहूलकर यांनी वाहन चालक मनीष सूर्यवंशी याला एक लाख रुपयांची सुपारी देऊन वृषाली गावंडे यांच्या स्कूटरला मुद्दाम धडक देण्याचा कट रचला होता. त्यानुसार एमएच २८ बीबी ५७५३ क्रमांकाच्या मालवाहू वाहनाने त्यांच्या एमएच २८ एएल ५८१५ क्रमांकाच्या स्कूटरला मागून धडक देऊन हा खून घडवून आणण्यात आला. या प्रकरणी आरोपींविरुद्ध भारतीय न्याय संहिता कलम १०६(१), २८१ तसेच मोटार वाहन कायदा कलम १३४ व १७७ अन्वये गुन्हा दाखल करण्यात आला आहे.सदर घटनेचा पुढील तपास पोलीस निरीक्षक नितीन पाटील यांच्या मार्गदर्शनाखाली पोलीस उपनिरीक्षक स्नेहा शेंडगे करीत आहेत.