३५ हजारांच्या बदल्यात साडेतीन लाखांचे आमिष! लुटीचा कट पोलिसांनी उधळला दोन सराईत आरोपी जेरबंद; ९५ हजारांचा मुद्देमाल जप्त!
पोलिसांनी दिलेल्या माहितीनुसार, हैदराबाद येथील दोन व्यक्तींना केवळ ३५ हजार रुपयांच्या बदल्यात तब्बल ३ लाख ५० हजार रुपये मिळतील, असे आमिष दाखविण्यात आले होते. या बहाण्याने त्यांना मलकापूर येथे बोलावून लुटण्याचा कट काही आरोपींनी रचला होता. याबाबतची खात्रीशीर माहिती मलकापूर शहर पोलिसांना मिळाल्यानंतर पोलिसांनी तातडीने हालचाली सुरू केल्या.
त्यानुसार पोलिसांनी गोपाळकृष्णनगर परिसरात सापळा रचला. संशयित आरोपी घटनास्थळी येताच पोलिसांनी त्यांना ताब्यात घेत कारवाई केली. अटक करण्यात आलेल्या आरोपींमध्ये ईश्वर अशोक मेसरे (वय ३४, रा. नरवेल, ता. मलकापूर, सध्या यशोधाम कॉलनी, मलकापूर) आणि गौतम मुकुंदा तायडे (वय २२, रा. रमाईनगर, मलकापूर) यांचा समावेश आहे.
या कारवाईदरम्यान आरोपींकडून एकूण ९५ हजार ५०० रुपयांचा मुद्देमाल जप्त करण्यात आला. पोलिसांच्या सतर्कतेमुळे मोठी लुटीची घटना घडण्यापूर्वीच उधळून लावण्यात यश आले. या प्रकरणी मलकापूर शहर पोलीस पुढील तपास करीत असून आरोपींच्या इतर साथीदारांचा शोधही घेतला जात आहे.