"पाडळी शिंदेतील खुनाचा अवघ्या ४ तासांत उलगडा; एसपी निलेश तांबे यांच्या मार्गदर्शनाखाली ठाणेदार रुपेश शक्करगेंची दमदार कामगिरी!
आज सकाळी सुमारे ६ वाजण्याच्या सुमारास मच्छिंद्र मोरे यांचा खून झाल्याची माहिती अंढेरा पोलिसांना मिळताच पोलिसांचे पथक तातडीने घटनास्थळी दाखल झाले. पंचनामा करून तपासाची चक्रे वेगाने फिरू लागली. बुलढाण्यावरून फॉरेन्सिक पथक आणि श्वानपथकालाही घटनास्थळी बोलावण्यात आले. दुसरीकडे ठाणेदार रुपेश शक्करगे यांनी आपल्या गोपनीय यंत्रणेला कामाला लावत परिसरातील सीसीटीव्ही फुटेजची बारकाईने तपासणी सुरू केली.
तपासादरम्यान काही संशयित पोलिसांच्या रडारवर आले. त्याचवेळी बुलढाण्यावरून आलेल्या पोलिस दलाच्या श्वानाने घटनास्थळावरून थेट एका संशयिताच्या घराच्या दिशेने धाव घेतली. सीसीटीव्ही फुटेज, गोपनीय माहिती आणि श्वानपथक या तिन्ही तपासाच्या धाग्यांनी एकाच व्यक्तीकडे बोट दाखवल्याने पोलिसांनी संशयिताला ताब्यात घेतले. कसून चौकशी करताच आरोपीने गुन्ह्याची कबुली दिली आणि खुनाचे गूढ काही तासांतच उलगडले.
करंट लागून बकरी मेली... अन् घेतला जीव!
पोलिस सूत्रांनी दिलेल्या माहितीनुसार, मयत मच्छिंद्र मोरे यांनी घरात विजेच्या खांबावरून आकोडा टाकला होता. तीन दिवसांपूर्वी त्या आकोड्याचा करंट लागून आरोपी मच्छिंद्र माणिकराव सरोदे याची बकरी मृत्युमुखी पडली होती. यावरून दोघांमध्ये वाद झाला होता. गावातील सरपंच आणि पोलिस पाटील यांनी मध्यस्थी करत हा वाद मिटविल्याचे सांगितले जात असले तरी आरोपी सतत बकरीच्या मोबदल्यासाठी पैशांची मागणी करत होता.
काल सायंकाळी आरोपीने आपल्या मामेभावाला बोलावले. दोघांनी मिळून मच्छिंद्र मोरे यांना धमकावले. त्यानंतर रात्री दोघांनीही संगनमताने त्यांच्या डोक्यात काठीने जबर मारहाण करत त्यांचा खून केला आणि घटनास्थळावरून पसार झाले.
एसपींचे मार्गदर्शन, ठाणेदारांची रणनीती अन् श्वानपथकाची अचूक कामगिरी
या गुन्ह्याचा उलगडा करण्यात जिल्हा पोलीस अधीक्षक निलेश तांबे यांचे प्रभावी मार्गदर्शन, ठाणेदार रुपेश शक्करगे यांनी आखलेली तपासाची अचूक रणनीती, गोपनीय यंत्रणेची माहिती, सीसीटीव्ही फुटेजचे विश्लेषण, फॉरेन्सिक पथक आणि बुलढाणा पोलिस दलाच्या श्वानपथकाची अचूक कामगिरी निर्णायक ठरली. अवघ्या चार तासांत आरोपींना अटक करून पोलिसांनी तपासातील आपली कार्यक्षमता पुन्हा एकदा सिद्ध केली असून या कारवाईचे जिल्हाभरातून कौतुक होत आहे.