"बुलडाणा लाइव्ह"च्या बातमीनंतर अधिकाऱ्यांचा रातभर जागता पहारा! उपविभागीय अधिकारी मध्यरात्री धरणावर गेले! रेतीमाफिया दडून बसले! माफियांच्या काळ्या कमाईला ब्रेक.....

चिखली( बुलडाणा लाइव्ह वृत्तसेवा): काल, सायंकाळी बुलडाणा लाइव्ह ने प्रकाशित केलेल्या एका वृत्तामुळे रेतीमाफियांमध्ये एकच खळबळ उडाली. "कोण धुतल्या तांदळासारखा? मग रेतीवाले मोकाट सुटतातच कसे? कलेक्टर साहेब हा घ्या पुरावा" या मथळ्याखाली वृत्त प्रकाशित करीत बुलडाणा लाइव्हने अवैध रेती वाहतूक होत असल्याचे जिवंत पुरावे व्हिडिओ फुटेजच्या माध्यमातून समोर आणले होते. त्यामुळे काल रातभर रेतीमाफियांवर जागता पहारा ठेवण्याची वेळ अधिकाऱ्यांवर आली, तसे आदेश स्थानिक प्रशासनाला थेट जिल्हाधिकारी कार्यालयातून देण्यात आल्याचे सूत्रांनी सांगितले. विशेष म्हणजे स्वतः उपविभागीय अधिकारी प्रा. संजय खडसे यांनी देखील मध्यरात्री खडकपूर्णा धरणावर जाऊन पाहणी केली.शिवाय चिखली तहसील कार्यालय, देऊळगाव राजा तहसील कार्यालयाचे पथक देखील गस्तीवर होते, वाहतूक होणाऱ्या रस्त्यांवर ठाण मांडून होते. त्यामुळे एकही गाडी रेती घेऊन बाहेर येऊ शकली नाही, ज्या गाड्या रेती आणण्यासाठी गेल्या होत्या, त्यांनादेखील दडून बसावे लागले..एकंदरीत "बुलडाणा लाइव्ह"च्या एका वृत्ताने बोटीवाले, टिप्परवाले यांच्या एका रात्रीत होणाऱ्या जवळपास १५ ते २० लाखांच्या काळ्या कमाईला ब्रेक बसला..अर्थात या धंद्याला छुपा आशीर्वाद देणाऱ्यांचेही थोडेफार नुकसान झालेच..