देवदर्शनाहून परतताना काळाचा घाला! रस्ता ओलांडून दुसऱ्या बाजूला जात असताना भरधाव एसटी बसची ज्येष्ठ नागरिकाला जोरदार धडक;

मिळालेल्या माहितीनुसार, रमेश मुंढे हे कुटुंबीयांसह दुधा ब्रह्मपुरी येथे देवदर्शनासाठी गेले होते. दर्शन आटोपल्यानंतर ते आपल्या वाहनाने घराकडे परतत होते. दरम्यान, शुक्रवारी (६ नोव्हेंबर) रात्री आठ वाजताच्या सुमारास मेहकर–सुलतानपूर महामार्गावरील मोगरा हॉटेलजवळ त्यांनी लघुशंकेसाठी वाहन थांबवले. रस्त्याच्या पलीकडे गेल्यानंतर ते पुन्हा वाहनाकडे परतण्यासाठी रस्ता ओलांडत होते. मात्र, याचवेळी दुसऱ्या बाजूने येणाऱ्या एसटी महामंडळाच्या बसने त्यांना जोरदार धडक दिली.

धडक इतकी जोरदार होती की, रमेश मुंढे गंभीर जखमी झाले. अपघाताचा आवाज ऐकताच वाहनातील कुटुंबीयांनी तातडीने खाली उतरून त्यांच्याकडे धाव घेतली. डोक्याला जबर मार लागल्याने त्यांची प्रकृती चिंताजनक झाली होती. कुटुंबीयांनी त्यांना तातडीने मेहकर येथील ग्रामीण रुग्णालयात दाखल केले.

प्राथमिक उपचारानंतर प्रकृती गंभीर असल्याने त्यांना पुढील उपचारासाठी छत्रपती संभाजीनगर येथे हलविण्यात आले. मात्र, उपचार सुरू असतानाच त्यांची प्राणज्योत मालवली. देवदर्शनासाठी आनंदाने घराबाहेर पडलेल्या कुटुंबावर परतीच्या प्रवासातच दुःखाचा डोंगर कोसळला.दरम्यान, या अपघातानंतर मेहकर पोलिसांनी अज्ञात एसटी बसचालकाविरुद्ध शनिवारी (७ नोव्हेंबर) गुन्हा दाखल केला आहे. अपघात नेमका कसा घडला, याचा पुढील तपास पोलीस करीत आहेत. महामार्गावर रस्ता ओलांडताना घडलेल्या या दुर्दैवी घटनेने पुन्हा एकदा रस्ते सुरक्षेचा प्रश्न ऐरणीवर आला आहे.