भीषण अपघात! धाड येथे एसटी बसखाली चिरडून तिघांचा जागीच मृत्यू; करडी (धाड) पुलावर दुचाकी–एसटीची समोरासमोर धडक; परिसरात शोककळा...

मलकापूर आगाराची एसटी बस क्रमांक MH-06-BW-3638 ही आज छत्रपती संभाजीनगरहून मलकापूरकडे जात होती. त्याच वेळी ढालसावंगी (ता. बुलढाणा) येथील अंकुश पाडळे, रवी चंदनशे व कैलास शिंदे हे तिघे दुचाकीवरून धाडहून करडीच्या दिशेने जात होते. करडी (धाड) पुलावर येताच एसटी बस व दुचाकीची समोरासमोर जोरदार धडक झाली. या अपघातात दुचाकीचा चुराडा होऊन ती थेट बसखाली अडकली. तिन्ही दुचाकीस्वारांना गंभीर दुखापत होऊन त्यांचा घटनास्थळीच मृत्यू झाला. अपघात इतका भीषण होता की परिसरात काही काळ तणावाचे वातावरण निर्माण झाले.
या दुर्दैवी घटनेमुळे ढालसावंगी गावावर शोककळा पसरली आहे. घटनेची माहिती मिळताच नागरिकांनी घटनास्थळी मोठी गर्दी केली. पोलिसांनी तात्काळ घटनास्थळी धाव घेत पंचनामा करून पुढील तपास सुरू केला आहे.