मोटारची वायर कापण्यावरून वाद; महिलेस मारहाण, रायपूर पोलिस ठाण्यात गुन्हा दाखल...
Dec 23, 2025, 11:27 IST
बुलढाणा (बुलडाणा लाइव्ह वृत्तसेवा) : वाघापूर शिवारातील शेतात मोटारची वायर कापण्याच्या कारणावरून झालेल्या वादातून हाणामारीची घटना घडली. या घटनेत एक महिला जखमी झाली असून, याप्रकरणी रविवारी रायपूर पोलिस ठाण्यात गुन्हा दाखल करण्यात आला आहे.
वाघापूर येथील शेतकरी वैशाली संजय ठेंग यांनी शेजारील शेतकरी संतोष भगवान केवट, त्यांची पत्नी व मुलीविरुद्ध मारहाण व जीवे मारण्याची धमकी दिल्याची तक्रार दाखल केली आहे. तक्रारीनुसार, २१ डिसेंबर रोजी दुपारी त्या आपल्या शेतात नवीन सीसीटीव्ही कॅमेरा बसवत असताना संतोष केवट अचानक धावून आले व त्यांनी वाद घालत हल्ला केला. या हाणामारीत वैशाली ठेंग जखमी झाल्या. तसेच संतोष केवट यांच्या पत्नी व मुलीनेही मारहाण करून जीवे मारण्याची धमकी दिल्याचे तक्रारीत नमूद आहे. मागील काही दिवसांपासून त्यांच्या शेतातील पंप मोटारची वायर अज्ञात व्यक्तीकडून वारंवार खोडसाळपणे कापली जात असल्याचाही आरोप फिर्यादीत करण्यात आला आहे. या प्रकरणी रायपूर पोलिसांनी गुन्हा दाखल केला असून, पुढील तपास सुरू आहे.