‘लाचखोरीचा खेळ’ उघड; अपर कोषागार अधिकाऱ्यासह तिघे एसीबीच्या जाळ्यात! फॅमिली पेन्शनसाठी २० हजारांची मागणी; मृत पोलिसाच्या कुटुंबालाच लुटण्याचा प्रयत्न...
पेन्शनसाठी लाचेची मागणी
तक्रारदाराचे वडील २०२२ मध्ये पोलीस विभागातून सेवानिवृत्त झाले होते. २०२५ मध्ये त्यांचे निधन झाले. त्यांच्या पश्चात आईच्या नावे फॅमिली पेन्शन सुरू करण्यासाठी आवश्यक कागदपत्रांची प्रक्रिया जिल्हा कोषागार कार्यालयात प्रलंबित होती. ही प्रक्रिया मार्गी लावण्यासाठी संबंधित अधिकाऱ्यांनी २० हजार रुपयांची लाच मागितल्याची तक्रार एसीबीकडे करण्यात आली.
दि. २६ फेब्रुवारी २०२६ रोजी एसीबीने लाच मागणीची पडताळणी केली. या वेळी तिन्ही आरोपींनी २० हजार रुपयांची मागणी करून तडजोडीअंती १५ हजार रुपये स्वीकारण्यास संमती दर्शविली.यानंतर दि. २७ फेब्रुवारी २०२६ रोजी जिल्हा कोषागार कार्यालयात सापळा रचण्यात आला. अपर कोषागार अधिकारी मोंढे व लेखा लिपीक काळे यांच्या समक्ष कनिष्ठ लेखापाल घट्टे यांनी तक्रारदाराकडून १५ हजार रुपयांची लाच स्वीकारताच एसीबीने त्यांना रंगेहात पकडले.
या प्रकरणी तिन्ही आरोपींविरुद्ध भ्रष्टाचार प्रतिबंध अधिनियम, १९८८ अंतर्गत गुन्हा दाखल करण्याची प्रक्रिया सुरू आहे. शासकीय कार्यालयात पेन्शनसारख्या संवेदनशील विषयावर लाच मागितल्याने संताप व्यक्त होत आहे.
ही कारवाई अॅन्टी करप्शन ब्युरो अमरावती परिक्षेत्राचे पोलीस अधीक्षक बापू बांगर, अप्पर पोलीस अधीक्षक सचिंद्र शिंदे आणि पोलीस उपअधीक्षक भागोजी चोरमले यांच्या मार्गदर्शनाखाली करण्यात आली. पोलीस निरीक्षक रमेश पवार व विलास गुसिंगे यांच्यासह एसीबीच्या पथकाने ही धडक कारवाई यशस्वीरीत्या पार पाडली.
तक्रार करण्याचे आवाहन
शासकीय लोकसेवकाकडून लाचेची मागणी झाल्यास नागरिकांनी त्वरित एसीबी बुलढाणा कार्यालयाशी दूरध्वनी क्रमांक ०७२६२-२४२५४८, व्हॉट्सअॅप क्रमांक ९४०५०९१०६४ किंवा टोल फ्री क्रमांक १०६४ वर संपर्क साधावा, असे आवाहन करण्यात आले आहे.
पेन्शनसारख्या हक्काच्या सुविधेसाठी लाच मागणाऱ्यांवर एसीबीने केलेली ही कारवाई म्हणजे भ्रष्टाचाराविरुद्धचा थेट इशारा मानला जात आहे.