काळी-पिवळी उलटली; १३ प्रवासी जखमी; नांदुरा–जळगाव जामोद रस्त्यावरील निमगाव फाट्याजवळ अपघात...
Jan 6, 2026, 10:09 IST
नांदुरा (बुलडाणा लाइव्ह वृत्तसेवा) : अवैध प्रवासी वाहतूक करणारी काळी-पिवळी उलटल्याने झाल्याने झालेल्या भीषण अपघातात १३ प्रवासी जखमी झाले.ही घटना नांदुरा–जळगाव जामोद मार्गावरील निमगाव फाट्याजवळ सोमवारी सायंकाळी सुमारे पाच वाजता घडली. जखमींपैकी काहींची प्रकृती गंभीर असल्याने त्यांना पुढील उपचारासाठी खामगाव येथे हलविण्यात आले आहे.
प्राप्त माहितीनुसार, एम.एच. २८ एम ३०८६ क्रमांकाची काळी-पिवळी रिक्षा जळगाव जामोद येथून नांदुऱ्याकडे प्रवासी घेऊन येत होती. निमगाव फाट्याजवळ चालकाचे स्टेअरिंगवरील नियंत्रण सुटल्याने रिक्षा पलटी होऊन रस्त्याच्या कडेला असलेल्या खड्ड्यात जाऊन पडली. त्यामुळे काळी पिवळीतील प्रवासी जखमी झाले.
या अपघातात प्रणाली महेंद्र वानखेडे (१७, रा. अकोली, ता. जळगाव जामोद), शाहीस्ता महमूद खान (२०, रा. सुरत), फरीदा महमूद खान (४०, रा. सुरत), अमान महमूद खान (१०, रा. सुरत), अक्षरा संतोष तेलंग (७, रा. पिं. राजा), अन्नपूर्णा संतोष तेलंग (३८, रा. पिं. राजा), अंजना अशोक तायडे (६७, रा. नांदुरा), संतोष रुस्तम तेलंग (४५, रा. पिं. राजा), अशोक निनाजी तायडे (७२, रा. नांदुरा), शबनम पठाण महमूद पठाण (२०, रा. सुरत), महमूदखान बिस्मिल्लाह खान (५३, रा. सुरत), भुसरा खान महमूद खान (१६, रा. सुरत) आणि शाहीन जाकीर देशमुख (२४, रा. सुरत) असे एकूण १३ प्रवासी जखमी झाले आहेत.
अपघातानंतर स्थानिक नागरिकांच्या मदतीने जखमींना तातडीने नांदुरा प्राथमिक आरोग्य केंद्रात दाखल करण्यात आले. प्राथमिक उपचारानंतर काही जखमींची प्रकृती गंभीर असल्याने त्यांना खामगाव येथे रेफर करण्यात आल्याची माहिती सूत्रांनी दिली.