BIG BREAKING आमदार संजय गायकवाड यांच्याविरुद्ध बुलढाणा शहर पोलीस ठाण्यात गुन्हा दाखल! पोलिसांनीच केली तक्रार.. मॅटर काय?
मुख्यमंत्री देवेंद्र फडणवीसही म्हणाले, शिंदेंनी गायकवाडांना कडक समज द्यावी,नाहीतर ॲक्शन....
Apr 27, 2025, 08:52 IST
बुलडाणा(बुलडाणा लाइव्ह वृत्तसेवा): बुलढाणा शहर पोलीस ठाण्यात बुलढाणा विधानसभा मतदारसंघाचे आमदार संजय गायकवाड यांच्या विरोधात गुन्हा दाखल करण्यात आला आहे. विशेष म्हणजे शिवसेनेचे मुख्य नेते आणि राज्याचे उपमुख्यमंत्री एकनाथ शिंदे आज,२७ एप्रिलला बुलढाणा शहरात येत आहेत, या पार्श्वभूमीवर आ.गायकवाड यांना पोलिसांनी गुन्ह्याचा दणका दिला आहे. आ.गायकवाड यांनी २५ एप्रिलला एका पत्रकार परिषदेत पोलिसांवर चांगलेच तोंडसुख घेतले होते, त्या विधानावरून आमदार गायकवाड यांच्या विरोधात गुन्हा दाखल करण्यात आला आहे.
Advt 👆
२५ एप्रिल रोजी आ. गायकवाड यांनी त्यांच्या मातोश्री जनसंपर्क कार्यालयात एक पत्रकार परिषद घेतली होती. पत्रकारांनी विचारलेल्या एका प्रश्नावर आ.गायकवाड यांनी पोलिसांच्या कार्यक्षमतेवरच प्रश्नचिन्ह उपस्थित केले होते." पोलिसां इतके अकार्यक्षम डिपार्टमेंट महाराष्ट्र आणि भारत सोडून जगात कुठेच नाही. सरकारने गुटखाबंदी केली की पोलिसांचा एक हप्ता वाढतो, एखादा कठोर कायदा केला की एक हप्ता वाढतो. पोलिसांनी एखाद्या कारवाईत ५० लाख पकडले की ५० हजार दाखवतात. पोलिसांनी इमानदारपणे काम केले तर जगातली सगळी गंदगी खतम होऊ शकते." असे आ.गायकवाड म्हटले होते. या संबंधित वृत्त देखील बुलडाणा लाइव्ह ने प्रकाशित केले होते. दरम्यान याच वक्तव्यावरून आ. गायकवाड यांच्या विरोधात बुलढाणा शहर पोलीस ठाण्यात गुन्हा दाखल केला आहे. स्वतः पोलिसच या प्रकरणात फिर्यादी आहे. पोलिसांप्रती अप्रीतीची भावना चेतवल्याचा आरोप आ. गायकवाड यांच्यावर ठेवण्यात आला आहे.
मुख्यमंत्री देवेंद्र फडणवीस म्हणाले...
दरम्यान आमदार गायकवाड यांच्या या वक्तव्यावरून राज्याचे मुख्यमंत्री देवेंद्र फडणवीस देखील संतप्त झाले आहेत. पोलिसांबद्दल हे असे बोलणे चुकीचे आहे, मी स्वतः या संदर्भात उपमुख्यमंत्री एकनाथ शिंदे यांना सांगणार आहे,की त्यांना कडक समज द्या. हे असं चालणार नाही, हे योग्य नाही.तरीही ते जर वारंवार बोलणार असतील तर ॲक्शन घेतली जाईल" अस देवेंद्र फडणवीस यांनी म्हटलं आहे.