अवैध मुरुम उत्खननावर कारवाईस गेलेल्या तहसीलदारांच्या पथकावर हल्ला; मंडळ अधिकाऱ्याला धक्काबुक्की, पोलिसांत गुन्हा...
कारवाईदरम्यान संबंधितांनी आक्रमक भूमिका घेत पथकाला धमक्या दिल्या. “वाहनांना हात लावून दाखवा, एकेकाला पाहून घेऊ,” अशी धमकी देत आठ ते दहा जणांनी मंडळ अधिकारी लक्ष्मण सानप यांना धक्काबुक्की व शिवीगाळ केली. याचवेळी टिप्पर चालकाने पथकाचा मार्ग अडविण्यासाठी टिप्परमधील मुरुम रस्त्यावर टाकून वाहतूक ठप्प केली. त्यानंतर उत्खननासाठी वापरण्यात आलेली जेसीबी, टिप्पर व कार घेऊन आरोपी घटनास्थळावरून पसार झाले.
या प्रकरणी ग्राम महसूल अधिकारी संतोष पनाड यांच्या फिर्यादीवरून मेहकर पोलिसांनी महाराष्ट्र जमीन महसूल संहिता तसेच भारतीय दंड संहिता २०२३ अंतर्गत शासकीय कामात अडथळा, धमकी, चोरी, रस्ता अडवून गोंधळ घालणे आदी कलमान्वये गुन्हा दाखल केला आहे. पोलिसांनी चार आरोपींना अटक केली असून एक जेसीबी व एक टिप्पर ताब्यात घेतले आहे. इतर वाहनांचा शोध सुरू असल्याची माहिती तपास अधिकारी सहाय्यक पोलिस निरीक्षक अशोक अवचार यांनी दिली.
विशेष म्हणजे, याच परिसरात २ डिसेंबर रोजीही अवैध मुरुम उत्खनन व विना रॉयल्टी वाहतूक करणाऱ्या एका टिप्परवर तहसीलदार भूषण पाटील यांनी कारवाई करत १ लाख २० हजार रुपयांचा दंड वसूल केला होता. मात्र, त्यानंतरही अवैध उत्खनन सुरूच असल्याने महसूल व पोलिस प्रशासनासमोर मोठे आव्हान उभे राहिले आहे.