रक्तदान शिबिरावरून चिखलीत दोन गटांमध्ये हाणामारी; दोन्ही गटातील ४० जणांविरुद्ध गुन्हा दाखल !

By Buldana Live Sep 12, 2025, 17:12 IST

बुलडाणा लाइव्ह ग्रुप चे सदस्य होण्यासाठी येथे क्लिक करा.

चिखली (बुलडाणा लाइव्ह वृत्तसेवा) : शहरातील विविध ठिकाणी घेण्यात आलेल्या रक्तदान शिबिरावरून दोन गटांमध्ये बुधवारी रात्री बाबू लॉज चौकात तुफान हाणामारी झाली. या प्रकरणी परस्परविरोधी तक्रारींवरून पोलिसांनी दोन्ही गटांतील ४० हून अधिक आरोपींविरुद्ध गुन्हे दाखल केले. तसेच, सामाजिक शांततेचा भंग केल्याच्या तक्रारीवरून आधीच गुन्हे दाखल झालेल्या २१ जणांविरुद्धही विविध कलमांनुसार कारवाई करण्यात आली. दोन्ही गटांतील आरोपींविरुद्ध तसेच पोलिसांच्या तक्रारीवरून वेगळे गुन्हे दाखल होणे ही चिखली शहरातील पहिलीच घटना ठरली आहे.

बाबू लॉज चौकाजवळील रहिवासी शेख इसरार शेख निसार (२४) याच्या तक्रारीवरून उबेद अली खान, इरफान अली खान, साद अली खान, उजेब अली खान, दानियल अली खान, शफाहत अली खान, परवेज अली खान, शहबाज अली खान, मुदस्सीर अहमद अली, सोहेल शब्बीर अली यांच्यासह २० ते २५ आरोपींविरुद्ध गुन्हे नोंदविण्यात आले.

शेख इसरारच्या दुकानासमोर १० सप्टेंबर रोजी रात्री त्याच्या वडिलांवर काहीजण धावून गेले. त्यावेळी शेख इसरारने अडविण्याचा प्रयत्न केला असता आरोपींनी शिवीगाळ करीत धमक्या दिल्या. त्यानंतर फरहान शेखला दुकानावर बोलावले असता वाद आणखी वाढला. काही वेळाने आरोपी पुन्हा दुकानासमोर जमा झाले आणि मारहाण केली, असे फिर्यादीत नमूद आहे.

दरम्यान, उजेद अली खान (२०) यानेही परस्परविरोधी तक्रार दिली. त्यानुसार, रक्तदान शिबिरावरून वाद झाल्याने शेख निसार शेख कादर, शेख अनिस शेख कादर, शेख अतिक शेख रफिक, शेख इसरार शेख निसार, शेख तौफीक शेख रफिक, शेख रईस शेख अफसर, शेख सकलैन शेख अनिस, शेख जिशान शेख अनिस, शेख शाहरुख शेख हारुण, शेख अरबाज शेख अन्सार यांच्यासह इतर १० ते १५ जणांनी लोखंडी रॉड, चापटा व बुक्क्यांनी त्याला मारहाण केल्याची तक्रार करण्यात आली आहे.
तसेच, कायदा व सुव्यवस्था भंग झाल्याने पोलीस शिपाई मंगेश मोरे यांनी स्वतंत्र फिर्याद दिली असून, दोन्ही गटांतील आरोपींविरुद्ध गुन्हे दाखल करण्यात आले आहेत.