मळणी यंत्रात अडकल्याने २४ वर्षीय मजुर जागीच ठार; गजरखेड शिवारात सोयाबीन काढताना घडला अपघात..!
Updated: Oct 4, 2025, 12:41 IST
हिवरा आश्रम (बुलडाणा लाइव्ह वृत्तसेवा) :सोयाबीन काढत असताना मळणी यंत्रात अडकल्याने २४ वर्षीय मजुर जागीच ठार झाला.ही दुर्दैवी घटना गजरखेड शिवारात ३ ऑक्टोबर रोजी दुपारी एकच्या सुमारास घडली. या घटनेमुळे परिसरात हळहळ व्यक्त होत आहे.आकाश कचरू देवकुळे (वय २४ रा.गाजरखेड) असे मृतकाचे नाव आहे.
मिळालेल्या माहितीनुसार, गजरखेड येथील आकाश कचरू देवकुळे हा गावातीलच संजय बाबुराव पवार यांच्या मळणी यंत्रावर मजूर म्हणून काम करत होता. त्या ठिकाणी देविदास मोहन रहाटे यांच्या शेतातील सोयाबीनची सुडी काढण्याचे काम सुरू असताना आकाश सोयाबीनचे काड मळणी यंत्रात टाकत असताना अचानक त्याचा तोल गेला आणि तो यंत्रात अडकला. या अपघातात त्याचा जागीच मृत्यू झाला.
आकाशच्या मृत्यूने गजरखेड गावात शोककळा पसरली आहे. त्याच्या पश्चात आई, दोन भाऊ आणि तीन बहिणी असा मोठा आप्तपरिवार आहे.
घटनेची माहिती मिळताच साखरखेर्डा पोलिस ठाण्याचे बीट जमादार डोईफोडे यांनी घटनास्थळी धाव घेतली. या प्रकरणी पोलिसांत औपचारिक तक्रार दाखल झालेली नव्हती.