बुलढाणा नगरपरिषदेची प्रभाग रचना नियमबाह्य – उद्धव सेनेच्या प्रवक्त्या ॲड. जयश्री शेळके यांचा आरोप..!
Sep 1, 2025, 19:55 IST
बुलढाणा (बुलडाणा लाइव्ह वृत्तसेवा) : महाराष्ट्र शासनाच्या मार्गदर्शक सूचनांनुसार नगरपरिषदेची प्रभाग रचना करणे अपेक्षित असतानाही बुलढाणा नगरपरिषदेने तयार केलेली प्रभाग रचना ही नियमबाह्य असून नागरिकांच्या हिताला बाधक असल्याचा आरोप शिवसेना (उद्धव बाळासाहेब ठाकरे) पक्षाच्या प्रवक्त्या ॲड. जयश्री शेळके यांनी केला आहे. या संदर्भात त्यांनी नगरपरिषदेकडे लेखी आक्षेप नोंदविला असून शासनाच्या मार्गदर्शक तत्त्वांनुसार नव्याने सुस्पष्ट, न्याय्य व सुयोग्य प्रभाग रचना जाहीर करण्याची मागणी केली आहे.
शासनाच्या आदेशानुसार प्रभाग रचना उत्तर दिशेकडून सुरू करून सलग क्रमाने करणे अपेक्षित होते. मात्र, बुलढाणा नगरपरिषदेने ही रचना वायव्य दिशेकडून सुरू केल्याने भौगोलिक सलगता भंग झाली आहे. तसेच नैसर्गिक सीमा – जसे की नदी, महामार्ग, रेल्वेमार्ग, प्रमुख रस्ते – यांचा विचार न करता प्रभाग ठरवण्यात आल्याने अनेक ठिकाणी विभागणी गोंधळात टाकणारी ठरली आहे. याशिवाय प्रभागांच्या सीमारेषा नागरिकांना समजतील अशा ओळखीच्या ठिकाणांऐवजी शेत सर्व्हे नंबरवर आधारित ठेवल्याने रचना अधिकच अस्पष्ट झाली आहे.
याशिवाय, विदर्भ हाऊसिंग सोसायटीसारखी एकसंध वस्ती जाणीवपूर्वक दोन प्रभागांत विभागल्याचा आरोप करण्यात आला आहे. अनुसूचित जाती-जमातींच्या वस्त्यांचे अन्यायकारक विभाजन करून त्यांचे मतदारसंघ हेतुपुरस्सर विभाजित करण्यात आल्याचेही नमूद करण्यात आले आहे. लोकसंख्येचे संतुलन न पाळता, नागरिकांच्या सोयीसुविधांकडे दुर्लक्ष करून नगरपरिषदेकडून मनमानी पद्धतीने सदर प्रभाग रचना करण्यात आल्याचे ॲड. शेळके यांनी सांगितले.
“ही प्रभाग रचना स्थळनिरिक्षण न करता, बसल्या ठिकाणी कागदोपत्री करण्यात आली आहे. नागरिकांचा गोंधळ वाढवून विशिष्ट राजकीय पक्ष किंवा व्यक्तीला फायदा व्हावा या उद्देशाने ही रचना हेतुपुरस्सर करण्यात आलेली आहे. सदर प्रभाग रचना रद्द करून शासनाच्या मार्गदर्शक तत्त्वांनुसार नव्याने आणि न्याय्य पद्धतीने प्रभाग रचना करण्यात यावी,” अशी ठाम मागणी ॲड. जयश्री शेळके यांनी केली.