बुलडाणा शहरात पुन्हा थरार; शेतकरी बीएसएनएल टॉवरवर चढला; रविवारच्या बाजारातील सगळ्यांच्या नजरा टॉवरवर
Updated: Sep 7, 2025, 17:23 IST
बुलडाणा (बुलडाणा लाइव्ह वृत्तसेवा): शहरातील कोर्ट चौक परिसर आज दुपारी पुन्हा एकदा थरारक घटनेचा साक्षीदार ठरला. येथील शेतकरी राजू भीमराव काकडे (वय ४०, रा. ) येळगाव यांनी बीएसएनएलच्या उंच टॉवरवर चढत प्रशासनाविरोधात संताप व्यक्त केल्याने शहरात मोठी खळबळ उडाली.
ही घटना दुपारी तीनच्या सुमारास घडली. टॉवरवर चढल्याचे त्यांनी स्वतःच आपल्या गावकऱ्यांना मोबाईलवरून कळवले. त्यानंतर त्यांनी मोबाईल बंद केल्याने परिस्थिती अधिक तणावपूर्ण झाली. अवघ्या काही मिनिटांत ही बातमी वाऱ्यासारखी पसरली आणि परिसरात नागरिकांची प्रचंड गर्दी झाली.
मिळालेल्या माहितीनुसार, काकडे यांची दोन एकर शेती येळगाव धरणाच्या भिंतीखालील बुडीत क्षेत्रात आहे. या जागेवर नगरपालिकेकडून सौंदर्यीकरणाचे काम सुरू करण्यात आले. मात्र, शेतकऱ्याच्या परवानगीशिवाय थेट काम हाती घेतल्यामुळे काकडे संतप्त झाले. शेवटी या निषेधार्थ त्यांनी टॉवरवर चढण्याचा थरारक निर्णय घेतला.
दरम्यान, त्यांचे भाऊ गोपाल भीमराव काकडे यांनीही या प्रकाराची पुष्टी केली. “शेतकऱ्याच्या अन्यायाविरोधातील हा आक्रोश आहे,” असे ते म्हणाले. घटनेमुळे बुलडाणा शहरात काही काळ तणावपूर्ण वातावरण निर्माण झाले आहे.
प्रशासन व पोलिसांनी तातडीने घटनास्थळी धाव घेत नागरिकांना शांत करण्याचा प्रयत्न केला. शेतकरी खाली उतरणार का, याकडे सर्वांचे लक्ष लागून राहिले आहे.या घटनेमुळे शेतकऱ्यांच्या प्रश्नांकडे पुन्हा एकदा समाजाचे आणि प्रशासनाचे लक्ष वेधले गेले आहे.