टॉवरवर चढून 'शोले स्टाईल' आंदोलन; बच्चू कडू यांच्या समर्थनार्थ अजय टप यांचे अनोखे आंदोलन...
Updated: Jun 11, 2025, 14:57 IST
मलकापूर (बुलडाणा लाइव्ह वृत्तसेवा) : प्रहार जनशक्ती पक्षाचे जिल्हा उपप्रमुख अजय टप यांनी आज मलकापूर येथील तहसील चौकातील बीएसएनएलच्या टॉवरवर चढून 'शोले स्टाईल' आंदोलन करत सरकारचे लक्ष वेधण्याचा प्रयत्न केला. हे आंदोलन पक्षप्रमुख बच्चू कडू यांच्या सुरू असलेल्या अन्नत्याग आंदोलनाच्या समर्थनार्थ करण्यात आले.
बच्चू कडू हे गेल्या चार दिवसांपासून शेतकरी, शेतमजूर, कष्टकरी व दिव्यांग बांधवांच्या न्याय मागण्यांसाठी उपोषण करत आहेत. मात्र शासन व प्रशासनाकडून त्यांच्या आंदोलनाची योग्य दखल घेतली जात नसल्याच्या निषेधार्थ अजय टप यांनी हे टोकाचे पाऊल उचलले.
टॉवरवरूनच त्यांनी प्रशासनाचा निषेध करत भविष्यात यापेक्षाही तीव्र आंदोलन छेडण्याचा इशारा दिला. प्रशासनाने तात्काळ बच्चू कडू यांच्या मागण्यांकडे लक्ष देऊन चर्चा करावी, अन्यथा रस्त्यावर मोठ्या प्रमाणावर जनआंदोलन उभे केले जाईल, असा इशाराही त्यांनी दिला.
या अनोख्या आंदोलनामुळे परिसरात काही काळ तणावाचे वातावरण निर्माण झाले होते. पोलिस व प्रशासनाने घटनास्थळी धाव घेऊन परिस्थिती नियंत्रणात आणली. यावेळी प्रहार जनशक्ती पक्षाचे कार्यकर्ते मोठ्या संख्येने उपस्थित होते.