श्रीक्षेत्र माकोडी येथे खोपडी बारस सोहळ्याला प्रारंभ; समर्थ सद्गुरु श्री.श्रीहरी महाराजांच्या हस्ते यज्ञकुंड प्रज्वलित; तिन दिवस विविध धार्मिक कार्यक्रम....
Nov 1, 2025, 10:33 IST
बुलढाणा (बुलडाणा लाइव्ह वृत्तसेवा) : श्रीक्षेत्र माकोडी येथे चातुर्मास समाप्ती निमित्त खोपडी बारस सोहळ्याला आजपासून सुरुवात झाली आहे. समर्थ सद्गुरु श्री.श्रीहरी महाराज यांच्या हस्ते सकाळी विधिवत यज्ञकुंड प्रज्वलित करण्यात आला. १ ते ३ नोव्हेंबर या तिन दिवसांमध्ये विविध धार्मिक कार्यक्रमाची रेलचेल यानिमित्ताने चैतन्य
मंदिर परिसरात राहिल.
राम नामाच्या प्रचार अन् प्रसारासाठी आपले संपुर्ण आयुष्य समर्थ सदगुरु श्रीहरी महाराज खर्ची घालत आहेत.
खोपडी बारस हा माकोडी भक्तांसाठी वार्षीक धार्मिक महोत्सव असतो. त्यामुळे तिन दिवस सदगुरु भक्तांची मांदीयाळी पहावयास मिळते.
दि. १ नोव्हेंबरला पहाटे ४ वाजता काकड आरतीने महोत्सवाला सुरुवात झाली. त्यानंतर पुजाविधी स्थापना व सकाळी ८ वाजता श्रीहरी महाराजांच्या हस्ते होमकुंड प्रज्वलीत करण्यात आला. दिवसभर होम हवन नंतर सायंकाळी ६ वाजता दैनंदिन उपासना व नंतर प्रसाद वाटप होईल. एकदशीला २ नोव्हेंबरला पहाटे काकडा आरती, ७ ते ११ होमहवन, दुपारी आरती फराळ प्रसाद, त्यानंतर ३ ते ५ होमहवन यजमान जोडप्यांच्या हस्ते पार पडेल. दरम्यान मलकापूर, निरपूर, जळगाव, जामोद, धामणगाव बढे, यासह पंचक्रोशीतील अनेक पायीदिंड्यांचे श्रीक्षेत्री आगमन होईल. सायंकाळी उपासनेनंतर भाविकांसाठी फराळप्रसाद वाटप होईल. रात्री ८ वाजता . हभप श्री गजानन महाराज गायकवाड (बुलढाणा) यांचे किर्तन पार पडेल.
दि. ३ नोव्हेंबर रोजी काकड आरती नंतर सकाळी ८.३० वाजता रामनाम जपाची श्रीहरी महाराजांच्या हस्ते यज्ञकुंडात पुर्णाहूती देण्यात येईल. सकाळी ९ वाजता समर्थ सदगुरु श्रीहरी महाराजांचे मुख्य मार्गदर्शन होईल. दरम्यान उपस्थित भाविकांना श्रीहरी महाराजांच्याहस्ते कापड प्रसादाचे वितरण होणार आहे. हभप ज्ञानेश्वरमाऊली निरपुरकर यांचे किर्तन, नंतर दुपारी नैवद्य आरती
झाल्यावर महाप्रसादाचे वितरण करण्यात येईल. त्यानंतर सायंकाळी तुळशी
विवाहाने सोहळ्याची सांगता होईल. दरम्यान अखंड पहारा सुरू झाला असून पंचक्रोशीतील भाविक ही सेवा देत आहेत.