तुपकरांच्या अन्नत्याग आंदोलनाचा चौथा दिवस; तुपकरांची तब्येत प्रचंड खालावली; हाइपोग्लाइसीमिया मुळे कोमात जाण्याची शक्यता? तुपकर म्हणाले, मी शहीद व्हायला तयार..

सोयाबीन कापसाची दरवाढ, पिकविम्याची रक्कम, जंगली जनावरांपासून शेती पिकांचे रक्षण यासह विविध मुद्यांवर रविकांत तुपकर यांनी अन्नत्याग आंदोलन सुरू केले आहे. या आंदोलनाचा वणवा आता गावागावात पेटत आहे. गावागावात प्रभातफेऱ्या, ग्रामसभांचे ठराव याद्वारे तुपकर यांच्या आंदोलनाला समर्थन वाढत आहे. आंदोलनाच्या चौथ्या दिवशी तुपकर यांची प्रकृती अधिकच खालावत चालली आहे. तुपकर मागण्यांच्या लेखी आश्वासनांवर ठाम आहेत. रक्तातील साखरेचे प्रमाण ५० पेक्षा कमी झाल्याने तुपकर यांना 

हाइपोग्लाइसीमिया होण्याचा धोका वाढला आहे. ज्यामुळे मेंदूला रक्तपुरवठा न झाल्यास रविकांत तुपकर पुढच्या काही तासांत कोमात जाऊ शकतात. 

मी शहीद व्हायला तयार..

माझी सरकारला एलर्जी असेल तर मला बाजूला करा. मी शहीद व्हायला तयार आहे,पण शेतकऱ्यांचं भलं करा, असे रविकांत तुपकर यांनी म्हटले आहे. माझ्या जीवाचे काही बरेवाईट झाले तर तर त्याला सर्वस्वी सरकार जबाबदार असेल, जोपर्यंत मागण्यांवर सकारात्मक निर्णय होऊन लेखी आश्वासन मिळत नाही तोपर्यंत जीव गेला तरी पोटात अन्नाचा कणही घेणार नाही म्हणजे नाहीच असे तुपकर यांनी ठणकावले आहे...