दुष्काळसदृश परिस्थितीत पशुधनासाठी चाऱ्याचे संकट टाळणार! बुलढाण्यात ७७ हजार किलो चारा बियाण्यांचे नियोजन ! वनक्षेत्रातील गवताचे संवर्धन करण्याचे जिल्हाधिकारी डॉ. प्रविणकुमार देवरे यांचे निर्देश;
चारा ज्वारीचे २१ हजार, तर मक्याचे ५६ हजार किलो बियाणे उपलब्ध होणार!
दुष्काळी परिस्थितीत पशुधनाच्या चाऱ्याचा प्रश्न गंभीर होण्याची शक्यता लक्षात घेता, वनक्षेत्रात उपलब्ध असलेल्या गवताचे संरक्षण करण्याच्या सूचना जिल्हाधिकाऱ्यांनी दिल्या आहेत. वनक्षेत्रातील गवताची अनधिकृत कापणी, वाहतूक किंवा विल्हेवाट होणार नाही, यासाठी वन विभागाने सतर्क राहून कडक देखरेख ठेवावी, असे निर्देश देण्यात आले आहेत. उपलब्ध चारा संसाधनांचे योग्य संवर्धन आणि नियोजनबद्ध वापर होण्यासाठी वन विभागाने पशुसंवर्धन विभागाशी समन्वय साधावा, असेही स्पष्ट करण्यात आले आहे.
ज्वारी आणि मक्याच्या बियाण्यांचा मोठा पुरवठा
चारा टंचाईवर मात करण्यासाठी चारा पिकांची लागवड वाढविणे हा महत्त्वाचा उपाय मानला जातो. यासाठी विदर्भ व मराठवाडा दुग्ध विकास प्रकल्पांतर्गत बुलढाणा जिल्ह्यासाठी चारा पिकांच्या बियाण्यांचा पुरवठा करण्यात येणार आहे. त्यानुसार २१ हजार किलो चारा ज्वारीचे, तर ५६ हजार किलो मक्याचे बियाणे उपलब्ध होणार आहे. अशा प्रकारे एकूण ७७ हजार किलो बियाण्यांच्या माध्यमातून चारा उत्पादन वाढविण्यास चालना मिळणार आहे. या बियाण्यांमुळे चारा पिकांची लागवड वाढवून आगामी काळातील पशुधनाच्या चाऱ्याची गरज भागविण्यास हातभार लागू शकतो.
पशुपालकांसाठी चारा संवर्धन महत्त्वाचे
दुष्काळसदृश परिस्थितीत जनावरांचे संगोपन करणे हे शेतकरी आणि पशुपालकांसमोर मोठे आव्हान ठरू शकते. चाऱ्याची उपलब्धता कमी झाल्यास पशुधनाच्या देखभालीचा खर्च वाढण्याची शक्यता असते. त्यामुळे उपलब्ध चाऱ्याचा काटकसरीने वापर करणे, चारा पिकांची लागवड वाढविणे आणि नैसर्गिक चारा संसाधनांचे संरक्षण करणे आवश्यक आहे.
जिल्ह्यात चारा टंचाईची परिस्थिती उद्भवू नये, यासाठी सर्व संबंधित विभागांनी गांभीर्याने आणि परस्पर समन्वयाने काम करावे, असे निर्देश जिल्हा प्रशासनाने दिले आहेत. तसेच शेतकरी आणि पशुपालकांनीही चारा संवर्धनाच्या उपाययोजनांना सहकार्य करून उपलब्ध चाऱ्याचे योग्य व्यवस्थापन करावे, असे आवाहन करण्यात आले आहे.आता प्रशासनाच्या नियोजनासोबतच चारा बियाण्यांचा प्रत्यक्ष पुरवठा, त्यांची लागवड आणि उपलब्ध चाऱ्याचे योग्य व्यवस्थापन कितपत प्रभावी ठरते, यावर आगामी काळातील पशुधनासाठी चाऱ्याची उपलब्धता अवलंबून राहणार आहे.