CRIME NEWS : भरदुपारी शेतात एकट्या शेतकऱ्याला गाठले, जबरदस्तीने वाहनात कोंबले अन् अपहरण केले! तब्बल ८ तास अज्ञात ठिकाणी डांबून बेदम मारहाण; रात्री ११ वाजता पुन्हा आणून सोडले!

मिळालेल्या माहितीनुसार, विश्वी येथील शेतकरी अनिल नामदेवराव शेवाळे हे ३० ऑक्टोबर २०२६ रोजी दुपारी ३ वाजेच्या सुमारास आपल्या शेतात एकटेच होते. नेहमीप्रमाणे शेतात असताना अचानक दिलीप देशमुख (रा. विश्वी) याच्यासह अन्य तीन अनोळखी व्यक्ती तेथे आल्या. फिर्यादीच्या तक्रारीनुसार, या चौघांनी संगनमत करून शेवाळे यांना जबरदस्तीने वाहनात बसवले आणि त्यांच्या इच्छेविरुद्ध अज्ञात ठिकाणी घेऊन गेले.भरदुपारी शेतातून अशा प्रकारे अपहरण करण्यात आल्याने शेवाळे यांच्यासमोर गंभीर परिस्थिती निर्माण झाली. आरोपींनी त्यांना नेमके कुठे नेले, याची माहिती अद्याप समोर आलेली नाही. मात्र, अज्ञात ठिकाणी नेल्यानंतर त्यांना तब्बल आठ तास बेकायदेशीररीत्या डांबून ठेवण्यात आले. या कालावधीत आरोपींनी आपल्याला बेदम मारहाण केल्याचे शेवाळे यांनी तक्रारीत नमूद केले आहे.

दुपारी ३ वाजता अपहरण; रात्री ११ वाजता सुटका!

या संपूर्ण प्रकरणातील सर्वाधिक धक्कादायक बाब म्हणजे शेतकऱ्याला तब्बल आठ तास डांबून ठेवण्यात आल्याचा आरोप आहे. दुपारी ३ वाजेच्या सुमारास सुरू झालेला हा प्रकार रात्री ११ वाजेपर्यंत चालला. त्यानंतर आरोपींनी शेवाळे यांना पुन्हा मूळ ठिकाणी आणून सोडल्याचे तक्रारीत म्हटले आहे. शेतकऱ्याचे अपहरण करण्यामागे नेमके कोणते कारण होते? आरोपींनी त्यांना आठ तास डांबून ठेवून मारहाण का केली? या घटनेमागे पूर्ववैमनस्य, शेतीचा वाद की अन्य काही कारण आहे? असे अनेक प्रश्न या घटनेमुळे उपस्थित झाले आहेत. मात्र, अपहरणामागील निश्चित कारण अद्याप स्पष्ट झालेले नसून पोलिसांच्या तपासातूनच या प्रश्नांची उत्तरे समोर येणार आहेत.

दिलीप देशमुखसह चौघांविरुद्ध गुन्हा; पोलीस तपास सुरू!

या घटनेनंतर अनिल शेवाळे यांनी डोणगाव पोलीस ठाणे गाठून आपल्यासोबत घडलेला प्रकार पोलिसांसमोर मांडला. त्यांच्या तक्रारीच्या आधारे ३ नोव्हेंबर रोजी पोलिसांनी दिलीप देशमुख (रा. विश्वी) आणि अन्य तीन अनोळखी इसमांविरुद्ध भारतीय न्याय संहितेच्या संबंधित कलमांन्वये गुन्हा दाखल केला आहे.या प्रकरणाचा पुढील तपास सहायक पोलीस निरीक्षक गणेश इंगोले करीत आहेत. तक्रारीत नमूद असलेल्या अन्य तीन व्यक्तींची ओळख पटवणे, घटनेत वापरण्यात आलेल्या वाहनाचा शोध घेणे आणि अपहरणामागील कारण स्पष्ट करणे, या बाबी तपासाच्या दृष्टीने महत्त्वाच्या ठरणार आहेत.