बुलढाण्यात १२ एप्रिलला एकल महिलांचा पुनर्विवाह सोहळा! सत्यशोधक पद्धतीने पार पडणार सोहळा; मानस फाउंडेशनचा पुढाकार...

मानस फाउंडेशन तर्फे समाजातील एकल महिलांच्या जीवनात प्रकाश टाकण्यासाठी पुनर्विवाहाची संकल्पना राबवली जात आहे. आतापर्यंत ९० पेक्षा अधिक पुनर्विवाह मानस फाउंडेशन कडून करण्यात आले. येत्या १२ एप्रिल रोजी महात्मा ज्योतिबा फुले तसेच डॉ.बाबासाहेब आंबेडकर यांच्या जयंतीनिमित्त एकल महिला (विधवा, परितक्त्या, घटस्फोटीत) यांचा सामूहिक पुनर्विवाह सोहळा व परिचय मेळाव्याचे आयोजन करण्यात आले आहे. या सोहळ्यात ८ जोडप्यांचे पुनर्विवाह होणार आहे. हा सोहळा सत्यशोधक पद्धतीने होणार आहे, सर्व विधी विधवा घटस्फोटीत महिलांच्या हस्ते केले जाणार आहेत. बुलढाणा येथील बस स्टँड समोरील सैनिक मंगल कार्यालय इथे हा सोहळा पार पडणार असल्याची  माहिती मानस फाउंडेशनचे संस्थापक अध्यक्ष डी.एस. लहाने यांनी आयोजित पत्रकार परिषदेत दिली आहे.