अकरावीत शिकणाऱ्या अल्पवयीन मुलीचे मध्यरात्री अपहरण; जळगाव जामोद तालुक्यातील घटना

बुलडाणा (बुलडाणा लाइव्ह वृत्तसेवा) : अकरावीत शिकणाऱ्या अल्पवयीन मुलीचे अपहरण करण्यात आल्याची घटना आज, ६ ऑगस्ट रोजी पहाटे तीनला पिंपळगाव काळे (ता. जळगाव जामोद) येथे समोर आली. मुलीच्या वडिलांनी जळगाव जामोद पोलीस ठाणे गाठून तक्रार दिली आहे.
मुलीचे वडील श्रीकृष्ण सदाशिव घुळे (रा. पिंपळगाव काळे, ता. जळगाव जामोद) यांनी दिलेल्या तक्रारीनुसार ते त्यांची पत्नी लताबाई, मुलगा प्रदीप आणि मुलगी आशासह राहतात. मुलगी आशा घुळे ही गावातीलच बी.एस. पटेल कॉलेजमध्ये अकरावीत शिकते. काल, ५ ऑगस्टला सायंकाळी ते शेतातून घरी आले. रात्री जेवण करून सर्व झोपले. आज पहाटे तीनला मुलगा प्रदीप पाणी पिण्यासाठी उठला असता त्याला आशा दिसली नाही. त्‍यामुळे त्याने वडिलांना व आईला उठवले. सर्वांनी तिचा गावभर शोध घेतला. मात्र ती मिळून न आल्याने त्यांनी सकाळीच पोलीस ठाण्यात धाव घेतली. कुणीतरी व्‍यक्‍तीने रात्रीतून मुलीचे अपहरण केले असल्याची तक्रार दिल्यावरून जळगाव जामोद पोलीस ठाण्यात गुन्हा दाखल करण्यात आला आहे.