पी.एम.सन्मान निधीचा २० वा हप्ता आज पंतप्रधान नरेंद्र मोदी यांच्या हस्ते होणार वितरित; बुलढाणा येथील कार्यक्रमात केंद्रीय मंत्री प्रतापराव जाधवांची उपस्थिती..!
Aug 2, 2025, 08:52 IST
बुलढाणा (बुलडाणा लाइव्ह वृत्तसेवा): प्रधानमंत्री किसान सन्मान निधी योजनेचा २० वा हप्ता आज, २ ऑगस्ट रोजी पंतप्रधान नरेंद्र मोदी यांच्या हस्ते शेतकऱ्यांच्या खात्यात थेट जमा केला जाणार आहे. यानिमित्ताने बुलढाणा येथील कृषी विज्ञान केंद्रात सकाळी ११ वाजता विशेष कार्यक्रमाचे आयोजन करण्यात आले आहे. या कार्यक्रमाला केंद्रीय आयुष, आरोग्य व कुटुंब कल्याण राज्यमंत्री प्रतापराव जाधव उपस्थित राहणार आहेत.
शेतकऱ्यांना आर्थिक पाठबळ देण्यासाठी केंद्र सरकारने ‘प्रधानमंत्री किसान सन्मान निधी योजना’ सुरू केली आहे. या योजनेअंतर्गत पात्र शेतकऱ्यांना दरवर्षी २,००० रुपयांचे तीन हप्त्यांमध्ये एकूण ६,००० रुपये दिले जातात. याच योजनेच्या २० व्या हप्त्याचे वितरण पंतप्रधान नरेंद्र मोदी यांच्या हस्ते होणार आहे. या कार्यक्रमाचे थेट प्रक्षेपण बुलढाणा येथील कृषी विज्ञान केंद्रात दाखविण्यात येणार असून, शेतकऱ्यांना विविध शेतीविषयक तांत्रिक मार्गदर्शनही दिले जाणार आहे. यामध्ये सुधारित सोयाबीन लागवड तंत्रज्ञान, हुमणी कीड ओळख व एकात्मिक व्यवस्थापन, तसेच सघन आंबा लागवड यासारख्या विषयांचा समावेश असेल. कार्यक्रमाला जिल्ह्याचे पालकमंत्री मकरंद जाधव पाटील, आमदार संजय गायकवाड, आमदार धीरज लिंगाडे यांचीही उपस्थिती लाभणार आहे.या कार्यक्रमाला शेतकरी बांधवांनी मोठ्या संख्येने उपस्थित राहावे, असे आवाहन कृषी विज्ञान केंद्राचे वरिष्ठ शास्त्रज्ञ व प्रमुख डॉ. अमोल झापे, जिल्हा अधीक्षक कृषी अधिकारी मनोज ढगे, तसेच आत्मा प्रकल्प संचालक पुरुषोत्तम उन्हाळे यांनी केले आहे.