हुमणी अळीच्या प्रादुर्भावामुळे शेतकऱ्यांचे मोठे नुकसान; दुबार पेरणीसाठी बियाणे व तातडीने भरपाई द्यावी; जयश्री शेळकेंची मागणी..!
Jul 29, 2025, 16:38 IST
बुलढाणा (बुलडाणा लाइव्ह वृत्तसेवा) : जिल्ह्यातील बुलडाणा, मोताळा आणि चिखली तालुक्यांमध्ये विशेषतः सोयाबीन पिकावर हुमणी अळी या किडीचा मोठ्या प्रमाणावर प्रादुर्भाव झाला आहे. यामुळे शेतकऱ्यांना गंभीर आर्थिक फटका बसला असून, काही भागांत ८० टक्क्यांपर्यंत नुकसान झाल्याचे निदर्शनास आले आहे.नुकसानग्रस्त शेतकऱ्यांना दुबार पेरणीसाठी बियाणे आणि आर्थिक मदत देण्याची मागणी उद्धव सेनेच्या प्रवक्त्या ॲड.जयश्री शेळके यांनी केली आहे.माेताळा तालुक्यातील माेहेगाव शिवारात शेळके यांनी २९ जुलै राेजी शेतकऱ्यांच्या बांधावर जावून पिकांची पाहणी केली.
हुमणी अळी ही जमिनीच्या आत राहणारी कीड असून ती पिकांच्या मुळांवर उपजीविका करते. त्यामुळे मुळे सडतात, पाने पिवळी पडतात, वाढ खुंटते आणि उत्पादनात लक्षणीय घट होते. ऊस, सोयाबीन, कापूस, हळद यांसारख्या पिकांमध्ये या अळीचा प्रादुर्भाव विशेषतः दिसून येतो.ऊस, सोयाबीन, कापूस, हळद यांसारख्या पिकांमध्ये हुमनी अळीचा प्रादुर्भाव विशेषतः दिसून येतो. जिल्ह्यातील कृषी विभागाच्या प्राथमिक अहवालानुसार सध्या ३१४.७४ हेक्टर क्षेत्र हुमणी अळीमुळे बाधित झाल्याचे नोंदवण्यात आले आहे. मात्र, प्रत्यक्षात बाधित क्षेत्र यापेक्षा जास्त असल्याचा अंदाज स्थानिक शेतकरी व कृषितज्ज्ञांनी व्यक्त केला आहे.
या पार्श्वभूमीवर शिवसेना (उद्धव बाळासाहेब ठाकरे) पक्षाच्या प्रवक्त्या ॲड. जयश्री शेळके यांनी काही दिवसांपूर्वी जिल्हाधिकाऱ्यांना निवेदन देऊन तातडीने पंचनामे करण्याची मागणी केली होती. आज त्यांनी मोताळा तालुक्यातील मोहेगाव शिवारात प्रत्यक्ष पीक पाहणी केली.
पंचनाम्यांचा साेपस्कार नकाे, तातडीने मदत द्या "फक्त पंचनामे करून भागणार नाही. शासनाने नुकसानग्रस्त शेतकऱ्यांना दुबार पेरणीसाठी मोफत किंवा सवलतीच्या दरात बियाणे उपलब्ध करून द्यावेत. तसेच झालेल्या नुकसानीची भरपाई तातडीने वितरित करावी," अशी मागणी शेळके यांनी केली आहे.
पावसाचे अनिश्चित स्वरूप, हुमणी अळीचा प्रकोप आणि वाढलेला उत्पादन खर्च यामुळे शेतकरी गंभीर आर्थिक अडचणीत सापडले आहेत. त्यामुळे प्रशासनाने पंचनाम्यांनंतर केवळ अहवाल नोंदवून थांबू नये, तर बाधित शेतकऱ्यांना तात्काळ मदत उपलब्ध करून द्यावी. शासनाने या परिस्थितीकडे गांभीर्याने पाहून तातडीने उपाययोजना कराव्यात, अशी मागणीही ॲड. शेळके यांनी केली.
पीक पाहणीवेळी मोताळा कृषि सहायक माधुरी बुंदे, राजूरचे तलाठी अजित पालवे, तसेच गोपीचंद राठोड, भास्कर पवार, लीलाबाई राठोड, धुपेश्वर राठोड, प्रमिलाबाई राठोड, उखा राठोड, गजानन जाधव, भारत राठोड, सागर चव्हाण, गजानन चव्हाण, आकाश राठोड, सचिन राठोड यांच्यासह मोहेगाव येथील अनेक शेतकरी उपस्थित होते.