देऊळगाव राजा शिवसेनेत ताना– तानी! कॉलर पकडली धक्काबुक्की झाली! आजी माजी पदाधिकारी भर बैठकीत आमने सामने! खा.जाधव आणि माजी आ.खेडेकर समर्थकांची गटबाजी

 काल देऊळगावराजा शिवसेनेच्या आढावा बैठकीला नवनियुक्त लोकसभा संपर्कप्रमुख संजय सोनार, माजी आ.खेडेकर आणि जिल्हाप्रमुख बळीराम मापारी उपस्थित होते. बैठक सुरू असतांना माजी तालुका प्रमुख अनिल चित्ते, दिपक बोरकर यांच्यासह काही शिवसैनिक बैठकीच्या ठिकाणी पोहचले..त्यांनी "शिवसेना जिंदाबाद" ची घोषणाबाजी केली. त्यानंतर लोकसभा संपर्कप्रमुख संजय सोनार यांचा सत्कार करण्याचा प्रयत्न त्यांनी केला मात्र तालुकाप्रमुख सुदाम काकड, उपजिल्हाप्रमुख दिनकर खरात यांच्यासह काही विद्यमान पदाधिकाऱ्यांनी "सध्या सत्कार नको, नंतर करा" असे सांगितले. दरम्यान थोड्यावेळाने देखील चित्ते आणि बोरकर यांना संजय सोनार यांचा सत्कार करू देण्यात आला नाही..त्यामुळे बैठकीच्या ठिकाणी तणावाचे वातावरण निर्माण झाले.  धक्काबुक्की आणि पकडा पकडी पर्यंत हा वाद पोहचला..

 दरम्यान या संदर्भात ने एका माजी पदाधिकाऱ्यांनी सांगितले की  या वादाला माजी आमदार शशिकांत खेडेकर कारणीभूत आहेत. नगरपालिका निवडणुकीच्या तिकीट वाटपात माजी आ.खेडेकर यांनी मनमानी केली. कारण नसतांना डॉ. शिंगणेंशी युती केली..ज्या धनुष्यबाणासाठी शिवसैनिकांनी विरोधकांना अंगावर घेतले तो धनुष्यबाण निवडणुकीत गोठवला.. ज्या पदाधिकाऱ्यांनी स्थानिक स्वराज्य संस्थेच्या निवडणुकीची तयारी सुरू केली त्यांच्यावर कारवाया केल्या. जिल्हा परिषद सर्कल मध्ये जे उमेदवार निवडणूक लढण्याची तयारी करीत आहेत त्यांच्यावर माजी आ.खेडेकर दात धरून आहेत, कारण त्यांना कुटुंबातील सदस्यांना उमेदवारी द्यायची आहे असेही या माजी पदाधिकाऱ्याने सांगितले.दरम्यान या संदर्भात माजी आ. खेडेकर यांच्याशी संपर्क साधला असता संपर्क होऊ शकला नाही.