अजितदादा अमर रहे’च्या जयघोषात अस्थी विसर्जन; सर्वसामान्यांचा आधारवड हरपला – डॉ.शिंगणे

शोकसभेत माजी आमदार राणा दिलीपकुमार सानंदा, शिवसेना (उद्धव बाळासाहेब ठाकरे) नेते दादाराव खार्डे, शिवसेना नेते दीपक बोरकर, रिपब्लिकन पार्टीचे नेते भाई दिलीप खरात आदींनी मनोगत व्यक्त करत स्व. अजितदादांना श्रद्धांजली वाहिली.

कार्यक्रमाचे प्रास्ताविक करताना राष्ट्रवादी काँग्रेस पार्टीचे अल्पसंख्याक प्रदेशाध्यक्ष अॅड. नाझेर काझी म्हणाले की, राज्यातील प्रत्येक जिल्ह्यात अजितदादांच्या अस्थी पाठवण्यात आल्या; मात्र बुलढाणा हा एकमेव जिल्हा ठरला जिथे संपूर्ण जिल्ह्यातील प्रत्येक मतदारसंघ व गावात अस्थिकलश दर्शनासाठी नेण्यात आला. “अजितदादांच्या रूपाने गोरगरिबांची न्यायदेवता हरपली,” अशी भावनिक प्रतिक्रिया त्यांनी व्यक्त केली.

शोकसभेत बोलताना राज्याचे मंत्री डॉ. राजेंद्र शिंगणे म्हणाले, “अजितदादांचा अस्थिकलश घेऊन जेव्हा आम्ही प्रत्येक गावात गेलो, तेव्हा केवळ एक नेता नव्हे तर प्रत्येक कुटुंबातील आधार गमावल्याची भावना नागरिकांच्या चेहऱ्यावर दिसत होती. त्यांच्या जाण्याने सर्वसामान्यांचा हक्काचा आधारवड हरपला आहे.”

यावेळी बालाजी संस्थानचे वंशपरंपरागत विश्वस्त राजे विजयसिंह जाधव, सिंदखेड राजाचे नगराध्यक्ष सौरभ तायडे, देऊळगाव राजाच्या नगराध्यक्षा माधुरी शिपणे, राष्ट्रवादी (शरदचंद्र पवार गट) जिल्हाध्यक्ष नरेश शेळके, डॉ. रामप्रसाद शेळके, भाजपा नेते गणेश मांटे तसेच विविध पक्षांचे पदाधिकारी, लोकप्रतिनिधी, प्रशासनातील अधिकारी आणि अजितदादांवर प्रेम करणारे हजारो नागरिक मोठ्या संख्येने उपस्थित होते.