आधार अपडेटसाठी आता लागणार ७५ रुपये, केवायसीठी ४० रुपये द्यावे लागणार; आधार सेवांचे नवे दर १ ऑक्टोबरपासून हाेणार लागू; आधार केंद्रांना दरपत्रक लावणे बंधनकारक...
Sep 30, 2025, 20:24 IST
बुलढाणा (बुलडाणा लाइव्ह वृत्तसेवा) : युनिक आयडेंटिफिकेशन अथॉरिटी ऑफ इंडिया (UIDAI) तर्फे जाहीर करण्यात आलेले सुधारित आधार सेवा दर १ ऑक्टोबर २०२५ पासून राज्यातील सर्व आधार केंद्रांवर लागू होणार आहेत. हे दर ३० सप्टेंबर २०२८ पर्यंत लागू राहतील, अशी माहिती जिल्हाधिकारी कार्यालयातील सेतू विभागाचे प्र. अधिकारी यांनी प्रसिद्धीपत्रकाद्वारे दिली.नविन दरानुसार एका किंवा अधिक क्षेत्रांचा (डेमोग्राफिक) अद्ययावत – ७५ रुपये, पत्त्याचा पुरावा/ओळखीचा पुरावा दस्तऐवज अद्ययावत करणे ७५ रुपये, ई-केवायसी किंवा आधार शोधून रंगीत प्रत ४० रुपये शुल्क लागणार आहे.
नवीन आधार नोंदणी तसेच ५ ते ७ वर्षे आणि १५ ते १७ वर्षे या अनिवार्य वयोगटातील मुलामुलींचे बायोमेट्रिक अद्ययावत मोफत राहणार आहे. तर ७ ते १५ वर्षे आणि १७ वर्षांवरील वयोगटासाठी बायोमेट्रिक अद्ययावत करण्यासाठी एक वर्षाकरिता शुल्क माफ करण्यात आले आहे.
आधार केंद्रांनी सुधारित सेवा दरांचे फलक केंद्रावर लावणे अनिवार्य असून, १ ऑक्टोबरपासून नागरिकांकडून केवळ निश्चित दरानुसारच शुल्क आकारणी करण्याचे आदेश देण्यात आले आहेत. जास्त शुल्क आकारल्यास संबंधितांविरुद्ध कठोर कारवाई केली जाणार आहे. यावर जिल्हा कार्यक्रम व्यवस्थापक व जिल्हा प्रशासन लक्ष ठेवणार आहे. नागरिकांना आधार सेवांबाबत तक्रार असल्यास rdc_buldhana@rediffmail.com किंवा dpmbuldhana1@gmail.com या ई-मेलवर लेखी तक्रार सादर करण्याचे आवाहन जिल्हा प्रशासनाकडून करण्यात आले आहे.