कुत्र्याचा कारनामा मालकाच्या अंगलट! पाळीव कुत्र्याने असं काही केलं की मालकाविरुद्ध गुन्हा दाखल! नांदुरा तालुक्यातील घटना...

बुलडाणा शहरात व जिल्ह्यातील ग्रामीण भागात भटक्या कुत्र्यांची संख्या आणि त्यांच्यामुळे होणारा उपद्रव सातत्याने वाढत आहे. गतवर्षी कुत्र्यांनी जवळपास २०० जणांना चावा घेतलाय. दरम्यान बुलडाणा नगरपालिकेने कराड येथील वेट्स फॉर ॲनिमल या संस्थेअंतर्गत येथील कानडी शास्त्री परिसरातील एका सेंटरवर जवळपास १५० ते २०० कुत्र्यांची नसबंदी केली होती. परंतु ही मोहीम अल्पावधीतच गुंडाळण्यात आली. आणि पुन्हा शहरात मोकाट कुत्र्यांचा, डुकरांचा सुळसुळाट वाढला. ग्रामीण भागात देखील ही स्थिती आहे.

नांदुरा तालुक्यातील धानोरा खुर्द शेत शिवारात ५ फेब्रुवारीला नारायण डाबेराव यांच्या मालकीच्या एका पाळीव कुत्र्याने अंबादास अर्जुन डाबेराव यांना पायाला चावा घेतल्याने ते जखमी झाले. याबाबत नांदुरा पोलीस ठाण्याला तक्रार करण्यात आली. अंबादास डाबेराव यांचे शेत आरोपी यांच्या शेताजवळ असल्याने ते दुचाकीने जात होते. दरम्यान आरोपीच्या गोठ्यातील त्यांचा पाळीव कुत्रा अचानकपणे बाहेर येऊन भुंकायला लागला. आरोपी मालकाला आवाज देऊनही ते बाहेर न आल्याने कुत्र्याने त्यांच्या पायाला चावा घेऊन जखमी केले. अशा तक्रारीवरून नांदुरा पोलिसांनी आरोपी नारायण डाबेराव विरुद्ध कलम २८९ नुसार गुन्हा दाखल केला. त्यामुळे कुत्रे पाळीव असो की मोकाट? त्यांचा उपद्रव थांबविण्यासाठी प्रशासकीय यंत्रणेने वेळीच उपायोजना करण्याची मागणी आता पुढे येत आहे.