'देवा कसा फास ह्यो तुझा..'! शेतकऱ्यांच्या आत्महत्यांचा आकडा उरात धडकी भरवणारा!

शेतकऱ्यांना सुरूवातीपासूनच अस्मानी संकटाशी दोन हात करावे लागतात. शिवाय विविध समस्यांना तोंड द्यावे लागते. अनेकदा हातातोंडाशी आलेला घास निसर्गाने हिरावल्या जातो. कर्ज काढून व तुटपुंजी जमापुंजी करत शेतकरी शेतातील कामे करतात. झालेल्या उत्पन्नाला पाहिजे तसा भाव मिळत नाही. अश्या अनेक प्रकारच्या संकट शेतकऱ्यांवर कोसळतात. यातून नैराश्य येते आणि जीवन संपवण्याचा टोकाचा निर्णय शेतकरी घेतात. मागील चार महिन्यात राज्यात ८३८ शेतकऱ्यांनी हा निर्णय घेत आपली जीवनयात्रा संपवली. तर जिल्ह्यातील १८ शेतकऱ्यांनी देखील मृत्यूला कवटाळल्याचे धक्कादायक वास्तव आहे..अर्थात हा आकडा उरात धडकी भरणारा आहे खरा पण गेंड्याची कातडी पांघरलेल्या सरकारला त्याचे काही सोयरसुतक दिसत नाही..