व्वा मानल नरुभाऊ..! राजकीय परिपक्वता अन् प्रगल्भता म्हणतात ती यालाच! नरेंद्र खेडेकरांनी गाठले रविकांत तुपकर यांचे कार्यालय, तुपकरांची गळाभेट घेतली!

 बुलडाणा लोकसभेची यंदाची निवडणुक जाम गाजली. प्रचारकाळात आरोप प्रत्यारोपांच्या फैरी झडल्या. अर्थात १५ वर्षे सत्ताधारी असल्याने खा.जाधव यांच्यावर टीका होणे हे विरोधकांकडून साहजिक होते, लोकशाहीत ते काही गैर नाही..मात्र टीका टिप्पणी करतांना ती व्यक्तिगत पातळीवर होऊ नये हा संकेत पाळायचा असतो. हल्लीच्या राजकारणात हा संकेत अपवाद वगळता कुणी पाळतांना दिसत नाही.. बर ते असो..मुद्दा आहे नरूभाऊ अन् रविभाऊंच्या भेटीचा..काल अचानक नरूभाऊ रविकांत तुपकर यांच्या कार्यालयात आले.. रविभाऊंनी पण नरूभाऊंचे दिलखुलास स्वागत केले.. दोघांनी गळाभेट घेतली.. गरमागरम चहाचा घोट घशात उतरवत असताना मनसोक्त गप्पा रंगल्या.."२०१९ ला जसं राजेंद्र शिंगणे यांच्यासाठी थांबलास तसं यंदा माझ्यासाठी थांबला असता तर लढत सोपी झाली असती" असं नरेंद्र खेडेकर यांनी म्हणताच या भेटीवेळी उपस्थित असलेले सगळेच खळाळून हसले..

त्यावर यंदा लढत गरजेचीच होती असं तुपकर म्हणाले. तुपकर यांनी अपक्ष असताना सुद्धा दिलेली लढत जोरदार अन् दमदार होती याबद्दल खेडेकर यांनी तुपकर यांचे कौतुक केले.जर मी संसदेत गेलो तर आपण ज्या शेतकऱ्यांच्या प्रश्नांवर लढता ते प्रश्न मी संसदेत नक्की उचलून धरीन असा शब्द यावेळी खेडेकर यांनी तुपकर यांना दिला. दोघांनी एकमेकांना विजयाच्या शुभेच्छा दिल्या..शेवटी नरेंद्र खेडेकर यांना सोडण्यासाठी तुपकर त्यांच्या कार्यालयाबाहेरील चिखली रोडवर आले, रस्त्यावर देखील दोघांमध्ये १५ ते २० मिनिटे चर्चा झाली..काल जे दोघे एकमेकांच्या विरोधात लढते ते एकमेकांना भेटत असल्याचे पाहून चिखली रोडवरून येणे जाणे करणाऱ्यांना आश्चर्याचा सुखद धक्का बसला..शेवटी काय तर नरूभाऊ आणि तुपकरांनी दाखवली ती राजकीय परिपक्वता...