बिबट्याच्या हल्ल्यात शेतकरी जखमी! मोताळा तालुक्यातील नळकुंडची घटना...
Updated: Sep 27, 2024, 10:09 IST
मोताळा (बुलढाणा लाइव्ह वृत्तसेवा):-बुलढाणा तालुक्यातील गिरडा पाठोपाठ आता बिबट्यांचा मुक्तसंचार मोताळा तालुक्यात सुध्दा वाढला आहे. नळकुंड येथे एका बिबट्याच्या हल्ल्यात शेतकरी सुभाष बावस्कर जखमी झाल्याची घटना २६ सप्टेंबर रोजी सकाळी ३ ते ४ वाजेच्या सुमारास घडली. जखमीवर जिल्हा रुग्णालयात उपचार सुरु आहे.
मोताळा वनपरिक्षेत्राच्या हद्दीतील नळकुंड येथे गट क्रमांक १६ मध्ये शेतकरी सुभाष किसन बावस्कर (वय ५५) हे शेतातील घरात झोपलेले होते. सकाळी ३ ते ४ वाजेच्या दरम्यान त्यांच्यावर अचानक बिबट्याने हल्ला चढविला. त्यामध्ये त्यांच्या डोक्याला मोठी दुखापत झाली.
हेडलाईन्स:-
- बिबट्यांचा मुक्त संचार....
- हिंस्त्र वन्यप्राण्यांचा बंदोबस्त करण्याची मागणी शेतकऱ्यांकडून होत आहे.
यावेळी समयसूचकता दर्शवित बचावासाठी बावस्कर यांनी मोठ्याने आरडा-ओरड केल्यामुळे बिबट्याने तेथून पळ काढल्याने पुढील अनर्थ टळला. घटनेची माहिती मिळताच मोताळा वनपरिक्षेत्र अधिकारी काळे, वनपाल जगताप, वनरक्षक कैलास तराळ यांनी घटनास्थळी धाव घेवून पंचनामा करुन जखमी सुभाष बावस्कार यांना उपचारासाठी जिल्हा सामान्य रुग्णालय, बुलढाणा येथे दाखल करण्यात आले. या घटनेमुळे नळकुंड परिसरातील शेतकऱ्यांमध्ये मोठी दहशत निर्माण झाली आहे. सदर हिंस्त्र वन्यप्राण्यांचा बंदोबस्त करण्याची मागणी शेतकऱ्यांकडून होत आहे.