अरेच्चा, १२३ दिवस प्रेमी जोडपे राहिले हातकडीत; बघत होते प्रेमाची परीक्षा, आता झाले विभक्त!
लंडन ः स्वतःला हातकडीमध्ये बांधून जगभर चर्चेचा विषय ठरलेल्या युक्रेनच्या प्रेमी जोडप्याचे बंधन केवळ 123 दिवसच टिकले. आता हे जोडपे केवळ हातकड्यांपासून मुक्त नाही तर त्यांचे मार्गही वेगळे झाले आहेत. या अनोख्या जोडप्याने आपले प्रेम वाचवण्यासाठी स्वत:ला हातकड्यांमध्ये बांधले होते. या परीक्षेत अपयशी झाल्यानंतर आता ते दोघेही वेगळ्या मार्गाने गेले आहेत. हातकडी काढून टाकल्यानंतर अलेक्झांडर आणि व्हिक्टोरिया म्हणाले की, या अनोख्या प्रयोगामुळे त्यांना अनेक कडव्या सत्यांना सामोरे जावे लागले. यापूर्वी, अलेक्झांडर आणि व्हिक्टोरियाने त्यांच्या प्रेमाच्या सामर्थ्याची चाचणी घेण्यासाठी स्वत: ला तीन महिन्यांसाठी बेड्या घालण्याचा निर्णय घेतला होता.
या वर्षाच्या सुरुवातीस, अलेक्झांडर आणि व्हिक्टोरिया यांनी व्हॅलेंटाईन डेच्या दिवशी युक्रेनची राजधानी कीवमधील युनिटीच्या पुतळ्यासमोर साखळी बांधली होती. या 123 दिवसांदरम्यान हे जोडपे दुकानातून बाथरूममध्ये एकत्र जायचे. व्हिक्टोरिया म्‍हणते, की आमच्यासाठी, युक्रेनमधील जोडपी आणि जगभरातील सगळ्या जोडप्यांसाठीच हा एक चांगला धडा आहे. आम्ही जे केले याची कोणीही पुनरावृत्ती करू नये, असे ती म्‍हणाली. या 123 दिवसांत तिला वैयक्तिक क्षणांची खूप आठवण आली. साखळीत असताना तिचा प्रियकर तिची तितकी काळजी घेत नसल्याची तिने तक्रार केली. दुसरीकडे अलेक्झांडर म्‍हणाला, की या प्रयोगामुळे त्यांना दोन समविचारी लोकांबद्दल समजून घेण्याची संधी मिळाली. आम्ही एकमेकांपासून पूर्णपणे भिन्न असल्याची जाणीव आम्‍हाला या प्रयोगामुळे झाली.
युक्रेनच्या नॅशनल रजिस्टर ऑफ रेकॉर्ड्‌स विटाले झोरिन यांनी सांगितले, की अलेक्झांडर आणि व्हिक्टोरिया यांच्यात फक्त काही सेंटीमीटर अंतर आहे. त्या जोडप्याने साखळ्यांमध्ये कोणतीही अडचण येऊ नये म्हणून विशेष कपडे घातले होते. यामुळे त्यांचे कपडे घालणे आणि कपडे काढणे त्यांच्यासाठी सोपे होते. त्यांनी स्नानगृहात एकत्र स्नान केले आणि कपडे वॉशिंग मशीनमध्ये ठेवले. प्रेमात बुडलेल्या या दाम्पत्याला आत्मविश्वास होता की पुढील तीन महिने अशा प्रकारे ते एकमेकांना साथ देतील. पण तसे होऊ शकले नाही. दोघेही तीन महिन्यांहून अधिक काळ एकत्र होते, पण आता त्यांचे प्रेम संपले आहे.
आता या जोडप्याला त्यांच्या हातकड्यांचा ऑनलाईन लिलाव करायचा आहे आणि त्यातून मिळालेले पैसे ते दान करणार आहेत. व्हिक्टोरिया आणि अलेक्झांडर यांचा हातकडी हटवण्याचा उपक्रम युक्रेनियन टीव्ही, वृत्तवाहिन्यांवर प्रसारित झाला. या जोडप्याने विभक्त झाल्यानंतरही विक्रम केला आहे. जगात इतके दिवस हातकडीत राहिलेलं हे पहिलं जोडपं आहे. त्यांनी इंस्टाग्रामवर आपल्या शेवटच्या पोस्टमध्ये एक फोटोही टाकला आहे. दोघांचे इन्स्टाग्रामवर 7800 फॉलोअर्स झाले होते.