शेतात जाणाऱ्या मुलीसोबत घडला हा धक्कादायक प्रकार!
चिखली (बुलडाणा लाइव्ह वृत्तसेवा) : लहान बहिणीसोबत शेतात जात असलेल्या १२ वर्षीय मुलीचा ३८ वर्षीय युवकाने विनयभंग केला. ही घटना आज, २३ नोव्हेंबर रोजी दुपारी तीनच्या सुमारास शेलसूर (ता. चिखली) शिवारात घडली. याप्रकरणी मुलीच्या वडिलांनी अमडापूर पोलीस ठाण्यात दिलेल्या तक्रारीवरून दीपक प्रकाश रिंढे (३८, रा. शेलसूर) याच्याविरुद्ध गुन्हा दाखल करण्यात आला आहे.
शेलसूर येथील अल्पवयीन मुलगी लहान बहिणीसोबत शेतात जात होती. त्यावेळी शिवारातील म्हसोबा मंदिराजवळ दीपकने तिला मिठीत ओढले व कपडे काढायला सांगितले. अचानक झालेल्या या प्रकारामुळे मुलीने व तिच्या लहान बहिणीने आरडाओरड केली. तेव्हा घडला प्रकार कुणाला सांगितल्यास जीवे मारण्याची धमकी देऊन दीपक घटनास्थळावरून पसार झाला. घडलेली हकीकत मुलीने तिच्या आई- वडिलांना सांगितली. वडिलांनी अमडापूर पोलीस ठाण्यात धाव घेऊन तक्रार दिली. संध्याकाळी सातच्या सुमारास या प्रकरणी गुन्हा दाखल करण्यात आला. तपास पोलीस उपनिरीक्षक पांडुरंग शिंदे करत आहेत.