भीषण अपघात : ट्रकने तिघांना उडवले; दोघे जागीच ठार

राजू कौतिकराव सुरडकर (३०, रा. भानखेड, ता. चिखली) व प्रसाद ठेंग (२६, रा. मकरध्वज खंडाळा, ता. चिखली) अशी अपघातात ठार झालेल्यांची नावे आहेत. रवि पारुबा इंगळे (२८, रा. भानखेड) गंभीर जखमी झाला आहे. प्रसादचा रेती वाहतुकीचा व्यवसाय आहे. भानखेड येथील रवी हा टिप्परवर चालक तर राजू क्लिनर म्हणून कामाला होता.

मध्यरात्री त्यांचे टिप्पर पंक्चर झाल्याने देऊळगाव मही येथील टेकाळे यांच्या दुकानासमोर टिप्पर उभे करून टायर खोलण्याचे काम सुरू होते. प्रसाद हातात टॉर्च घेऊन उभा होता, तर दोघे टायर खोलण्याचे काम करत होते. त्याचवेळी चिखलीकडून देऊळगाव राजाकडे जाणाऱ्या ट्रकने तिघांना उडवले. यात प्रसाद व राजू ट्रकखाली चिरडले गेल्याने जागीच ठार झाले. जखमी रवी इंगळेला औरंगाबादला उपचारासाठी हलविण्यात आले. अपघातास कारणीभूत ठरलेल्या ट्रकचालकाला देऊळगाव राजा पोलिसांनी ताब्यात घेतले आहे.